વિશાલ ગોસ્વામી સહિત ત્રણ આરોપીઓ દોષિત જાહેર
દસેક વર્ષ જૂના નારણપુરા ખંડણી કેસમાં મેટ્રોપોલિટન કોર્ટ દ્વારા તાજેતરમાં અત્યંત મહત્વપૂર્ણ ચુકાદો અપાયો છે. કોર્ટે ગોસ્વામી ગેંગના ત્રણ સભ્યોને દોષિત ઠેરવી પાંચ વર્ષની કેદની સજા ફટકારી છે. વિશાલ ગોસ્વામી, રિન્કુ ગોસ્વામી અને સતિષ ગોસ્વામી નામના આરોપીઓ વર્ષોથી ચાલતા કેસમાં અંતે કાનૂની સજાને પામ્યા છે. લાંબા સમયથી ચાલતી સંભળણીઓ બાદ કોર્ટના આ નિર્ણયથી ન્યાયિક પ્રક્રિયાને નવી દિશા મળ્યાનું માનવામાં આવી રહ્યું છે.
ખંડણીની માંગણીથી શરૂ થયેલુ આખું પ્રકરણ
વર્ષ 2014-2015 દરમિયાન નારણપુરામાં રહેતા હર્ષદભાઇ ઝીંઝુવાડીયાને જુદા જુદા નંબરથી ફોન કરી 50 લાખ રૂપિયાની ખંડણી માંગવામાં આવી હતી. આરોપી વિશાલ ગોસ્વામી સહિતના સાગરિતોએ ફરિયાદીની સામે દબાણ ઊભું કરીને જુદા જુદા બેંક ખાતામાં રૂપિયા જમા કરાવ્યા હતા. ફરિયાદી તરફથી કુલ 11 લાખ રૂપિયા ટ્રાન્સફર થયા હતા, જે બાદમાં આરોપીઓએ ઉપાડી લીધા હતા. આ બનાવ સામે ગંભીર ગુના નોંધાતા આખું શહેર એક સમયે ચકચારી થઇ ગયું હતું.
ફરિયાદ પછી ઝડપાયેલા આરોપીઓ અને દસ્તાવેજી પુરાવાની નક્કર અસર
ફરિયાદી હર્ષદભાઇના દીકરા ધર્મેશભાઇએ ક્રાઇમ બ્રાન્ચમાં ફરીયાદ નોંધાવી હતી. પોલીસે તમામ પુરાવા એકત્ર કરીને આરોપીઓ સામે ચાર્જશીટ દાખલ કરી હતી. છેલ્લા દશ વર્ષથી આ કેસની કાનૂની લડત ચાલી રહી હતી. ખાસ સરકારી વકીલ ચેતન શાહ અને કમલેશ જાયે કોર્ટ સમક્ષ મહત્વપૂર્ણ પુરાવાઓ રજૂ કરી સ્પષ્ટ કર્યું હતું કે આરોપીઓના ગુનાઓ પુરતા પ્રમાણમાં પુરવાર થાય છે અને સમાજમાં કાયદાનો ભય રહે તે માટે તેમને કડક સજા થવી આવશ્યક છે.
કોર્ટે આપેલો અંતિમ નિર્ણય અને લગાવેલો દંડ
બચાવ પક્ષની રજૂઆત સાંભળ્યા બાદ મેટ્રો કોર્ટે ત્રણેય આરોપીઓને પાંચ વર્ષની સજા સંભળાવી છે. સાથે સાથે વિશાલ ગોસ્વામી પર 1.75 લાખ અને રિન્કુ તથા સતિષ ગોસ્વામી પર 4 લાખ રૂપિયાનો દંડ ફટકાર્યો છે. આ દંડની રકમ ફરિયાદીને વળતર રૂપે આપવાનો આદેશ પણ કોર્ટએ કર્યો છે. આ ચુકાદા સાથે લાંબા સમયથી ચાલી રહેલા કેસને અંતે ન્યાય મળ્યો છે, જે ઘણા સમયથી રાહ જોવાતો હતો.
ગોસ્વામી ગેંગના ભૂતકાળના ગુનાઓનો ઉલ્લેખ
વર્ષ 2015માં અમદાવાદમાં ગોસ્વામી ગેંગે અનેક જવેલર્સ અને મોટા વેપારીઓને ધમકીભર્યા ફોન કરી ખંડણી માગવાનો ક્રમિક સિલસિલો શરૂ કર્યો હતો. કેટલાંક સ્થળોએ ફાયરિંગની ઘટનાઓ પણ નોંધાઇ હતી, જેના કારણે આ ગેંગે શહેરમાં ડરનું વાતાવરણ ઊભું કર્યુ હતું. ક્રાઇમ બ્રાન્ચે વિશાલ ગોસ્વામીને ઉત્તરપ્રદેશમાંથી ઝડપી પાડી અનેક કેસોમાં કાર્યવાહી શરૂ કરી હતી. હાલ આ કેસમાં મળેલી સજા તેમના ગુનાઇત ઇતિહાસને ધ્યાનમાં રાખી યોગ્ય ગણવામાં આવી રહી છે.
