સ્વાનિધિ યોજના હવે વધુ અસરકારક – લોનની રકમ વધારીને ₹90,000 કરી
કેન્દ્ર સરકાર દ્વારા દેશના શેરી વિક્રેતાઓ અને નાના વેપારીઓને આર્થિક સહાય પૂરી પાડવા માટે શરૂ કરાયેલી PM સ્વાનિધિ યોજનામાં મોટા ફેરફારો કરવામાં આવ્યા છે. હવે આ યોજના હેઠળ મળતી લોનની મહત્તમ રકમ ₹80,000 થી વધારીને ₹90,000 કરવામાં આવી છે. આ સાથે, સરકારે આ યોજનાની સમયમર્યાદા પણ 31 માર્ચ, 2030 સુધી લંબાવી છે, જેથી વધુ લોકોને લાભ મળી શકે.
યોજનાનો ઉદ્દેશ અને લાભાર્થીઓ
આ યોજનાનો મુખ્ય ઉદ્દેશ શેરી વિક્રેતાઓ અને નાના વેપારીઓને કોઈ પણ કોલેટરલ અથવા ગેરંટી વિના લોન આપીને તેમના વ્યવસાયને ફરીથી શરૂ કરવામાં મદદ કરવાનો છે. સરકારના આ નિર્ણયથી અંદાજે 1.15 કરોડ શેરી વિક્રેતાઓને ફાયદો થશે, જેમાં 50 લાખ નવા લાભાર્થીઓનો પણ સમાવેશ થાય છે.
લોન વિતરણની નવી પ્રણાલી
અગાઉ, લાભાર્થીઓને ₹80,000ની લોન ત્રણ હપ્તામાં મળતી હતી:
- પ્રથમ હપ્તો: ₹10,000
- બીજો હપ્તો: ₹20,000
- ત્રીજો હપ્તો: ₹50,000
નવા નિયમો લાગુ થયા બાદ, હવે લોનની રકમ નીચે મુજબ ત્રણ હપ્તામાં આપવામાં આવશે:
- પ્રથમ હપ્તો: ₹15,000
- બીજો હપ્તો: ₹25,000
- ત્રીજો હપ્તો: ₹50,000
સંપૂર્ણ લોન મેળવવા માટે, લાભાર્થીએ પહેલા અને બીજા હપ્તાની લોનની રકમ સમયસર પરત કરવી ફરજિયાત છે. આ યોજના હેઠળ લોન મેળવવાની પ્રક્રિયા અત્યંત સરળ છે. પાત્રતા માટે તમારી પાસે આધાર કાર્ડ અને પાન કાર્ડ હોવું જરૂરી છે. લોનની ચુકવણી માટે EMIની સુવિધા પણ ઉપલબ્ધ છે, જે નાના વેપારીઓ માટે બોજ ઓછો કરે છે.
આ યોજના દ્વારા સરકાર નાના વેપારીઓને સશક્ત બનાવીને દેશના અર્થતંત્રને ગતિ આપવાનો પ્રયાસ કરી રહી છે.
