રાજ્યની ITIમાં ઇલેક્ટ્રીક વાહન ટેકનોલોજીનો સમાવેશ, 40 EV કારથી યુવાઓને મળશે આધુનિક સ્કિલ ટ્રેનિંગ
ગુજરાતની સરકારી આઈ.ટી.આઈ. (ITI) માં ભણતા ૮,૦૦૦થી વધુ વિદ્યાર્થીઓ માટે હવે ઇલેક્ટ્રિક વાહનો (EV) વિશે શીખવું સરળ બનશે. મુખ્યમંત્રી ભૂપેન્દ્ર પટેલે ગાંધીનગર ખાતેથી ૪૦ જેટલી ઇલેક્ટ્રિક કારનું વિતરણ વિવિધ જિલ્લાઓની ITI માટે કર્યું છે. આ પહેલનો મુખ્ય હેતુ ઓટોમોબાઇલ ક્ષેત્રે આવી રહેલા પરિવર્તનને પહોંચી વળવા માટે રાજ્યના યુવાનોને અત્યાધુનિક ટેકનોલોજીથી સજ્જ કરવાનો છે.
નવીન ટેકનોલોજી અને રોજગારીની તકો
હાલમાં ઇલેક્ટ્રિક વાહનોનો વપરાશ વધતા બેટરી ટેકનોલોજી અને સોફ્ટવેર ક્ષેત્રે જાણકાર લોકોની માંગ વધી છે. આ માંગને પૂરી કરવા માટે સરકાર દ્વારા આપવામાં આવેલી આ કાર વિદ્યાર્થીઓને પ્રેક્ટિકલ તાલીમમાં મદદરૂપ થશે. વિદ્યાર્થીઓ ઇલેક્ટ્રિક પાવરટ્રેન જેવી નવીનતમ સિસ્ટમ વિશે પ્રાયોગિક જ્ઞાન મેળવીને આત્મનિર્ભર બની શકશે અને તેમને ઉદ્યોગોમાં નોકરીની ઉત્તમ તકો પણ મળશે.
શ્રમિકોના ઘર આંગણે પહોંચશે આરોગ્ય સુવિધા
કાર્યક્રમ દરમિયાન માત્ર કાર જ નહીં, પરંતુ શ્રમિકોના સ્વાસ્થ્ય માટે ૫૦ નવા ‘ધનવંતરી આરોગ્ય રથ’ અને ૬ મોબાઈલ મેડિકલ વાનનું પણ લોકાર્પણ કરવામાં આવ્યું છે. આ રથ ખાસ કરીને બાંધકામ અને ઉદ્યોગોમાં કામ કરતા શ્રમિકોના રહેઠાણ સુધી જઈને મફત સારવાર પૂરી પાડશે. આ સુવિધાને કારણે શ્રમિકો અને તેમના પરિવારજનોને પ્રાથમિક સારવાર મેળવવા માટે દૂર જવાની જરૂર નહીં પડે.
રાજ્યભરમાં આરોગ્ય રથનું વિસ્તરણ
નવા રથ ઉમેરવાથી હવે રાજ્યમાં કુલ ૨૦૬ ધનવંતરી રથ અને ૩૧ મોબાઈલ મેડિકલ વાન કાર્યરત થઈ ગયા છે. આ વાનમાં તાવ, ચામડીના રોગ જેવી સામાન્ય બીમારીઓથી લઈને લોહી અને પેશાબની તપાસ જેવી લેબોરેટરી સુવિધાઓ પણ ઉપલબ્ધ છે. સગર્ભા મહિલાઓ અને બાળકોની તપાસ સાથે જરૂરી દવાઓ પણ સ્થળ પર જ વિનામૂલ્યે આપવામાં આવે છે, જે શ્રમયોગીઓના કલ્યાણ માટે મોટું પગલું છે.
