લાખો યુવાનોના ‘ખાખી’ સ્વપ્નને સાકાર કરવા બાયોમેટ્રિક અને ચુસ્ત સુરક્ષાવાળી ભરતી પ્રક્રિયા શરૂ
ગુજરાતના લાખો યુવાનો માટે ખાખી વર્દી પહેરવાની તક હવે આંગણે આવી છે. ગુજરાત પોલીસ ભરતી બોર્ડ દ્વારા પીએસઆઈ (PSI) અને એલઆરડી (LRD) કેડરની કુલ ૧૩,૫૯૧ જગ્યાઓ માટે ભરતી પ્રક્રિયા પુરજોશમાં ચાલી રહી છે. રાજ્યના ૧૫ મુખ્ય શહેરો અને એસઆરપી (SRP) તાલીમ કેન્દ્રો પર આશરે ૧૦ લાખથી વધુ ઉમેદવારો પોતાની શારીરિક ક્ષમતાની પરીક્ષા આપી રહ્યા છે. ભરતી બોર્ડના અધ્યક્ષ નીરજા ગોટરુએ જણાવ્યું કે આ સમગ્ર પ્રક્રિયામાં ટેકનોલોજીનો એટલો પ્રભાવ છે કે અહીં માત્ર યોગ્યતા અને મહેનતને જ સ્થાન મળશે.
આધુનિક સિસ્ટમથી ગેરરીતિ પર બ્રેક
ભરતી પ્રક્રિયાને સંપૂર્ણ પારદર્શક અને ક્ષતિરહિત બનાવવા માટે અદ્યતન સાધનોનો ઉપયોગ કરવામાં આવ્યો છે. દોડના સચોટ સમય માટે દરેક ઉમેદવારના પગમાં આરએફઆઈડી (RFID) ચિપ લગાવવામાં આવે છે, જે સેકન્ડના સોમા ભાગ સુધીની ચોકસાઈ નોંધે છે. આ ઉપરાંત કોઈ પણ પ્રકારની બોગસ ઉમેદવારી અટકાવવા માટે દરેક તબક્કે બાયોમેટ્રિક ફિંગરપ્રિન્ટ અને ફેસ રેકગ્નિશન દ્વારા ઉમેદવારની ઓળખ પ્રસ્થાપિત કરવામાં આવે છે. શારીરિક માપણી પણ ડિજિટલ મશીનો દ્વારા કરવામાં આવે છે જેથી માનવીય ભૂલની કોઈ શક્યતા રહેતી નથી.
ગ્રાઉન્ડ પરની સુરક્ષા અને મેડિકલ સેવાઓ
ઉમેદવારોની શારીરિક ક્ષમતા કસોટી દરમિયાન કોઈ દુર્ઘટના ન બને તે માટે આરોગ્ય વિભાગના નિષ્ણાંત તબીબોની ટીમ સતત હાજર રહે છે. મેદાન પર ૧૦૮ એમ્બ્યુલન્સ, ઓઆરએસ (ORS) ના પેકેટ અને પીવાના પાણીની પૂરતી વ્યવસ્થા કરવામાં આવી છે. દરેક ગ્રાઉન્ડના ઇન્ચાર્જ તરીકે ડીઆઈજીપી (DIGP) અથવા એસપી (SP) કક્ષાના અધિકારીઓ ફરજ બજાવી રહ્યા છે. ગાંધીનગર ખાતે કાર્યરત સ્પેશિયલ કંટ્રોલ રૂમ દ્વારા તમામ મેદાનોનું સીસીટીવી (CCTV) સર્વેલન્સ દ્વારા સીધું નિરીક્ષણ કરવામાં આવી રહ્યું છે.
અપીલ બોર્ડ અને પરિણામની પારદર્શિતા
જો કોઈ ઉમેદવારને પોતાની ઊંચાઈ કે છાતીની માપણીમાં અસંતોષ હોય, તો તેમના માટે સ્થળ પર જ ‘અપીલ બોર્ડ’ ની સુવિધા ઉપલબ્ધ છે. આ બોર્ડમાં એસપી કક્ષાના અધિકારી અને મેડિકલ ઓફિસર હાજર રહે છે, જે તત્કાલ પુનઃ ચકાસણી કરીને પ્રશ્નનું નિરાકરણ લાવે છે. અત્યાર સુધીના આંકડા મુજબ ૧.૧૬ લાખથી વધુ ઉમેદવારોએ કસોટી આપી છે જેમાંથી ૫૦,૩૮૩ ઉમેદવારો સફળ થયા છે. આ હાઈટેક વ્યવસ્થાથી છેવાડાના ગામડાનો યુવાન પણ આજે પોલીસ તંત્ર પર પૂરો વિશ્વાસ વ્યક્ત કરી રહ્યો છે.
