હવામાન વિભાગે 1થી 6 ઓગસ્ટ સુધી હળવા વરસાદની આગાહી આપી
ગુજરાતના ઉત્તર અને મધ્ય ભાગોમાં આજથી સારો વરસાદ જોવા મળી શકે છે. હવામાન વિભાગ મુજબ, 1 ઓગસ્ટના દિવસે રાજ્યના મોટા ભાગમાં હળવાથી મધ્યમ વરસાદ થઈ શકે છે. જ્યારે કેટલીક જગ્યાએ ગાજવીજ સાથે વરસાદ પણ વરસી શકે છે. હવામાન વિભાગે 5 ઓગસ્ટ સુધી હળવા વરસાદની આગાહી કરી છે.
હાલની સ્થિતિ: ધાનેરામાં ભારે વરસાદથી હાલત બગડી
બનાસકાંઠાના ધાનેરા વિસ્તારમાં ત્રણ ઇંચ જેટલો ભારે વરસાદ નોંધાયો છે. ગ્રામિણ વિસ્તારોમાં પાણી ભરાતા પરિવહન વ્યવસ્થા ખોરવાઈ છે. રમુના રોડ પર વાહનો અટવાતા લોકોને મુશ્કેલી ભોગવવી પડી. ખેતરોમાં પાણી ભરાઈ જતાં ખેડૂતોએ ફરી નુકસાન સહન કરવું પડ્યું છે.
આગામી દિવસોમાં વરસાદનું જોખમ ઘટશે
હવામાન વિભાગની આગાહી પ્રમાણે 2 ઓગસ્ટથી 5 ઓગસ્ટ સુધી વરસાદનું જોર થોડું ઘટી શકે છે. દક્ષિણ ગુજરાત, સૌરાષ્ટ્ર અને કચ્છના કેટલાક ભાગોમાં છૂટાછવાયા ઝાપટાં પડવાની શક્યતા છે. જોકે, ભારે વરસાદની કોઈ ચેતવણી આપવામાં આવી નથી.
6 ઓગસ્ટથી વરસાદ ફરી લઈ શકે છે વેગ
અંબાલાલ પટેલ સહિત હવામાન નિષ્ણાતોએ જણાવ્યું છે કે 6 ઓગસ્ટ પછી વરસાદ ફરીથી તેજ બની શકે છે. ઉત્તર અને મધ્ય ગુજરાતના કેટલાક વિસ્તારોમાં 8થી 10 ઇંચ વરસાદ પડવાની સંભાવના છે. ખાસ કરીને નીચાણવાળા વિસ્તારોમાં લોકોને સતર્ક રહેવા સલાહ અપાઈ છે.
ઓગસ્ટ-સપ્ટેમ્બરમાં કેટલો પડશે વરસાદ?
હવામાન વિભાગના વડા ડૉ. મૃત્યુંજય મહાપાત્રાએ જણાવ્યું છે કે ઓગસ્ટમાં સામાન્ય વરસાદ અને સપ્ટેમ્બરમાં સામાન્ય કરતાં વધુ વરસાદ પડી શકે છે. દેશમાં અત્યાર સુધીમાં સરેરાશ કરતા વધુ વરસાદ નોંધાયો છે. હવામાનની અનુકૂળ સ્થિતિને લીધે જુલાઈમાં છ જેટલી લો-પ્રેશર સિસ્ટમ સર્જાઈ હતી, જેના કારણે હિમાચલ અને ઉત્તર ભારતના ઘણા વિસ્તારોમાં અચાનક પૂર જેવી સ્થિતિ સર્જાઈ હતી.
કેટલાક વિસ્તારોમાં ઓછો વરસાદ, ખેડૂતો ચિંતિત
હવામાન વિભાગ અનુસાર દક્ષિણ પશ્ચિમ સૌરાષ્ટ્ર, પૂર્વ ભારત તથા મધ્ય ભારતના કેટલાક ભાગોમાં સામાન્ય કરતા ઓછો વરસાદ થઈ શકે છે. આથી ઉત્તર અને દક્ષિણ ગુજરાતના ખેડૂતો માટે ચિંતાની લાગણી ઊભી થઈ છે. બીજી તરફ, રાજ્યના અન્ય વિસ્તારોમાં સામાન્યથી વધુ વરસાદની શક્યતા છે.
