હવામાન વિભાગે આપ્યું એલર્ટ
ગુજરાતમાં થોડા દિવસો સુધી વરસાદે વિરામ લીધા બાદ હવે ફરીથી મેઘરાજા ધમાકેદાર વાપસી કરી રહ્યા છે. હાલ રાજ્ય પર ત્રણ મુખ્ય વાયુમંડલીય સિસ્ટમ સક્રિય છે, જેના કારણે આગામી 7 દિવસ દરમિયાન અનેક વિસ્તારોમાં વરસાદ વરસવાની આગાહી કરવામાં આવી છે. ખાસ કરીને આગામી બે દિવસ દરમિયાન ભારેથી અતિભારે વરસાદની શક્યતા હવામાન વિભાગે દર્શાવી છે.
ઉત્તર ભારતમાં લો પ્રેશર અને સાઈક્લોનિક અસર
હવામાન વિભાગના અમદાવાદ કેન્દ્રના નિર્દેશક એ. કે. દાસે માહિતી આપી હતી કે હાલમાં ઉત્તર પશ્ચિમ મધ્યપ્રદેશ અને રાજસ્થાનના કેટલાક ભાગોમાં લો-પ્રેશર એરિયા સક્રિય થયો છે. તેની સાથે સાઈક્લોનિક સર્ક્યુલેશન અને ટ્રફ લાઇન સર્જાતા, ગુજરાતના વાતાવરણમાં ભારે ભેજ અને વરસાદી વાતાવરણનું નિર્માણ થયું છે.
દરિયો તોફાની બની શકે, માછીમારો માટે ચેતવણી
આગામી પાંચ દિવસ સુધી દરિયો ખૂબ જ તોફાની રહેશે તેવી આગાહી કરવામાં આવી છે. માછીમાર ભાઈઓને ખાસ ચેતવણી આપવામાં આવી છે કે તેઓ 1 ઓગસ્ટ સુધી દરિયો ન ખેડે. પવનની ઝડપ 30થી 40 કિલોમીટર પ્રતિ કલાક સુધી રહી શકે છે. સાથે સાથે વીજળીના કડાકા ભડાકા સાથે ગાજવીજ અને ધોધમાર વરસાદ પડવાની પણ સંભાવના છે.
દાહોદમાં રેડ એલર્ટ, 12 જિલ્લામાં ઓરેન્જ એલર્ટ
હવામાન વિભાગના રિપોર્ટ અનુસાર, દાહોદ જિલ્લામાં સૌથી વધુ ખતરો દર્શાવાતાં ત્યાં રેડ એલર્ટ જાહેર કરવામાં આવ્યું છે. આ ઉપરાંત આણંદ, ખેડા, મહીસાગર, વડોદરા, પંચમહાલ, છોટાઉદેપુર, નર્મદા, સુરત, તાપી, નવસારી, ડાંગ અને વલસાડ જિલ્લામાં ઓરેન્જ એલર્ટ આપવામાં આવ્યું છે. અહીં છૂટાછવાયા સ્થળોએ અતિભારે વરસાદની શક્યતા છે.
સાત જિલ્લામાં યેલો એલર્ટ જાહેર
સુરેન્દ્રનગર, અમદાવાદ, બોટાદ, ભાવનગર, ભરૂચ, સાબરકાંઠા અને અરવલ્લી જિલ્લાઓમાં યેલો એલર્ટ જાહેર કરીને સામાન્યથી ભારે વરસાદની સંભાવના દર્શાવવામાં આવી છે. લોકો માટે એ મહત્વપૂર્ણ છે કે તેઓ નદીઓ, નાળાઓ અને નીચાણવાળા વિસ્તારોમાં જવાનું ટાળે.
29 જુલાઈથી વરસાદ ઘટવાની શક્યતા
હવામાન વિભાગ અનુસાર, 29મી જુલાઈથી વરસાદનું જોર ધીરે ધીરે ઘટતું જોવા મળશે. જોકે આણંદ, વડોદરા, પંચમહાલ, દાહોદ, ભરૂચ, નર્મદા, છોટાઉદેપુર, સુરત, તાપી, નવસારી, ડાંગ અને વલસાડમાં છૂટાછવાયા ભારે વરસાદની આગાહી યથાવત રહેશે.
સાવચેતી રાખો, સુરક્ષિત રહો
વિશિષ્ટ એલર્ટ વચ્ચે સામાન્ય જનતાને સલાહ આપવામાં આવી છે કે તેઓ જરૂરી હોય તો જ ઘરની બહાર નીકળે, અને તંત્રની સૂચનાઓનું પાલન કરે.
