8th Pay Commission : સરકારી કર્મચારીઓ માટે કેટલો પગાર વધારો અને ક્યારે?
8મા પગાર પંચ હેઠળ કેન્દ્રીય કર્મચારીઓનો લઘુત્તમ મૂળભૂત પગાર 18,000 રૂપિયાથી વધીને 51,480 રૂપિયા થઈ શકે
2026થી 8મા પગાર પંચની ભલામણો અમલમાં આવી શકે છે, જેથી ફેબ્રુઆરી 2026થી વધારેલા પગારનો લાભ મળવાનો શરૂ થશે
અમદાવાદ, ગુરુવાર
8th Pay Commission : મોદી સરકાર દ્વારા 8મા પગાર પંચ (8th Pay Commission)ની મંજૂરી આપવામાં આવી છે, જે સરકારી કર્મચારીઓ માટે મોટી રાહત લાવી શકે છે. આ જાહેરાત બાદ બે મુખ્ય સવાલો ચર્ચાનો વિષય બન્યા છે: પહેલો એ કે પગારમાં કેટલો વધારો થશે? અને બીજું, આ વધારો ક્યારે અમલમાં આવશે? આ સવાલોના ઉત્તર માટે સરકારી કર્મચારીવર્ગ અને નિષ્ણાતો દ્વારા સક્રિય ચર્ચાઓ થઈ રહી છે.
કેન્દ્રીય કર્મચારીઓના પગારમાં કેટલો વધારો થશે?
એક રિપોર્ટ અનુસાર, 8મા પગાર પંચ હેઠળ કેન્દ્રીય કર્મચારીઓના લઘુત્તમ મૂળભૂત પગારમાં (બેઝિક સેલેરી) મોટો વધારો થવાની શક્યતા છે. હાલના 18,000 રૂપિયાના લઘુત્તમ પગારને 51,480 રૂપિયા સુધી વધારવામાં આવી શકે છે. જોકે, આ સુધારાને અમલમાં મૂકવાની સમયસીમા અંગે હજુ વધુ સ્પષ્ટતા અપાઈ નથી.
નોંધનીય છે કે 7મા પગાર પંચનો કાર્યકાળ 1 જાન્યુઆરી 2026 સુધી છે, અને તેમા સમાપ્ત થતા જ 8મા પગાર પંચની ભલામણો લાગુ પડશે. તેમા મુજબ, 1 જાન્યુઆરી 2026થી નવી વ્યવસ્થા શરૂ થશે અને ફેબ્રુઆરી 2026થી સુધારેલા પગારનો લાભ મળતો થશે.
સરકારની યોજનાઓ અને સમયસર અમલ
કેન્દ્રીય માહિતી અને પ્રસારણ મંત્રી અશ્વિની વૈષ્ણવે જાહેર કર્યું છે કે 2025માં 8મા પગાર પંચની સ્થાપના કરાશે. આ પગલું 7મા પગાર પંચના કાર્યકાળના પૂરા થતા પહેલા ભલામણો અમલમાં મૂકવા માટે પૂરતો સમય પૂરો પાડશે. સરકારે અમલ માટે ઝડપી આયોજન શરૂ કર્યું છે, જેથી પેન્શનધારકોને પણ ફેબ્રુઆરી 2026થી વધારાના લાભ મળી શકે.
રાજ્ય કર્મચારીઓ માટે અસર
કેન્દ્રીય પગાર પંચની ભલામણો તમામ રાજ્યોમાં સીધી લાગુ થતી નથી. દરેક રાજ્ય સરકાર પોતાના કર્મચારીઓ માટે આ ભલામણો અમલમાં મૂકવા માટે સ્વતંત્ર છે. મહારાષ્ટ્ર અને તમિલનાડુ જેવા કેટલાક રાજ્યોએ 7મા પગાર પંચની ભલામણો સ્વીકારી હતી, જ્યારે કેટલાક રાજ્યોમાં વિલંબ થયો હતો.
ફિટમેન્ટ ફેક્ટર અને પગાર વૃદ્ધિ
7મા પગાર પંચમાં ફિટમેન્ટ ફેક્ટર 2.57 રાખવામાં આવ્યું હતું, જેના કારણે લઘુત્તમ પગાર 7,000 રૂપિયાથી વધીને 18,000 થયો હતો. 8મા પગાર પંચમાં ફિટમેન્ટ ફેક્ટર વધારીને 2.86 રાખવાની શક્યતા છે, જે લઘુત્તમ પગારને 51,480 રૂપિયા સુધી પહોંચાડશે. આ પગલું સરકારી કર્મચારીઓ માટે મહત્વપૂર્ણ અસર લાવશે અને તેમના જીવનમાન્યાને ઉંચી સપાટી પર લઈ જશે.
આ વધારા સાથે સરકારી કર્મચારીવર્ગમાં નવા ઉત્સાહનો માહોલ ઉભો થયો છે. હવે, 2026 સુધીમાં નવા પગાર પંચના તમામ લાભો સરકારી કર્મચારીઓ સુધી પહોંચશે એવી આશા છે.
