Ahmedabad plane crash DNA match update: પ્લેનનો કોકપિટ વોઈસ રેકોર્ડર મળ્યો, તપાસમાં મળી શકે છે મહત્વની જાણકારી
Ahmedabad plane crash DNA match update: અમદાવાદમાં 12 જૂને થયેલી દુર્ઘટનાકારક વિમાન ક્રેશ બાદ હવે મૃતદેહોની ઓળખ અને તેમને પરિવારજનોને સોંપવાની પ્રક્રિયા ઝડપ પકડતી જોવા મળી રહી છે. અમદાવાદ સિવિલ હોસ્પિટલના સુપરિન્ટેન્ડેન્ટ ડૉ. રાકેશ જોશીના જણાવ્યા મુજબ, આજ સુધીમાં કુલ 119 મૃતદેહોના ડીએનએનો મેળાપ થઇ ગયો છે. જેમાંથી અત્યાર સુધીમાં 76 મૃતદેહો તેમના પરિવારજનોને સોંપી દેવાયા છે.
તંત્રએ સ્પષ્ટ સંદેશ આપ્યો છે કે, જેમના ડીએનએ મેચ થયા છે તેમના પરિવારજનોને હોસ્પિટલ તરફથી ફોન કરવામાં આવશે અને ત્યારબાદ જ મૃતદેહ લેવા માટે આવવાનું રહેશે. જ્યારે પણ કોઈ પરિવારને હજી સુધી કોલ મળ્યો નથી, તેમને સમજવું જોઈએ કે તેમના પરિવારજનના ડીએનએનું મૅચિંગ હજુ પ્રક્રિયામાં છે.
કાટમાળમાંથી મળ્યો વધુ એક અવશેષ, કોકપિટ વોઇસ રેકોર્ડર પણ મળી આવ્યું
વિમાનના અવશેષો હજી પણ ઘટના સ્થળે મળતા રહે છે. આજે વધુ એક માનવઅંગ મળી આવ્યું હતું જેને પોસ્ટમોર્ટમ માટે મોકલવામાં આવ્યું છે. સાથે જ તપાસ એજન્સીઓને પ્લેનના પાછળના ભાગમાંથી વાયરથી જોડાયેલું કોકપિટ વોઇસ રેકોર્ડર મળ્યું છે. આ CVR (Cockpit Voice Recorder) તપાસ માટે ખૂબ જ મહત્વનું માનવામાં આવી રહ્યું છે કારણ કે તેમાં પાઇલટો વચ્ચેની વાતચીત અને વિમાનના અંતિમ પળોના અવાજો રેકોર્ડ થયેલા હોય છે. શુક્રવારે ડેટા રેકોર્ડર મળી ચૂક્યો હતો, હવે બંને ડિવાઇસ મળતા તપાસને નવી દિશા મળશે.
મૃતદેહોની સોંપણી પ્રક્રિયા ઝડપી: કોફિન તૈયાર, દસ્તાવેજો સ્થળ પર
સિવિલ હોસ્પિટલમાં મૃતદેહો મૃતકના પરિજનો સુધી સન્માનપૂર્વક પહોંચાડવા માટે ખાસ વ્યવસ્થા ગોઠવાઈ છે. કોફિન પેકિંગ કર્યા પછી જરૂરી દસ્તાવેજો સાથે મૃતદેહ સીધા પરિવારજનોના ઘરે મોકલવામાં આવી રહ્યા છે. હોસ્પિટલમાં 170થી વધુ કોફિન તૈયાર રાખવામાં આવ્યા છે.
રાજ્ય સરકારે ભૂતપૂર્વ મુખ્યમંત્રીના અવસાનને લઈને રાજ્યવ્યાપી એક દિવસનો શોક જાહેર કર્યો છે. આજે તમામ સરકારી ઇમારતો પર રાષ્ટ્રધ્વજ અડધી કાઠીએ લહેરાયો.
પોલીસ, એજન્સીઓ અને વિદેશી તજજ્ઞોની હાજરી: તપાસ યથાવત
વિમાન દુર્ઘટનાના પાંચમા દિવસે પણ એરક્રાફ્ટ એક્સિડન્ટ ઇન્વેસ્ટિગેશન બ્યુરો (AAIB), અમેરિકન NTSB, યુકેની બોઇંગ સેફ્ટી ટીમ અને એર ઇન્ડિયાની ટીમ દ્વારા સ્થળ પર તપાસ ચાલુ છે. ઘટના સ્થળે US ફોરેન્સિક ટીમ પણ જવા માટે રવાના થઈ ચૂકી છે.
સુરતના ડૉક્ટર દંપતીના મૃતદેહ ઘરે પહોંચ્યા
સુરતના અડાજણ વિસ્તારમાં આવેલ સુજાતા સોસાયટીમાં ડૉક્ટર દંપતીના મૃતદેહ પહોંચતાં અનેક લોકો શ્રદ્ધાંજલિ આપવા માટે એકત્રિત થયા હતા. ડૉક્ટર કોમ્યુનિટી અને સ્થાનિક લોકો ભારે શોકમાં જોવા મળ્યા.
મૃતદેહોની હસ્તાંતરણ પ્રક્રિયા માટે જાહેર કરાયેલ સંપર્ક નંબરો
સિવિલ હોસ્પિટલ દ્વારા મૃતદેહ સંબંધિત માહિતી માટે નીચેના મોબાઇલ નંબરો જાહેર કરાયા છે. માત્ર આ અધિકૃત નંબર પરથી જ માહિતી આપવામાં આવે છે:
9429915911, 9429916096, 9429916118, 9429916378, 9429916608, 9429916622, 9429916682, 9429916758, 9429916771, 9429916875…
