Ahmedabad Plane Crash Investigation: વિમાનના કાટમાળની તપાસ માટે ખાસ આયોજન
Ahmedabad Plane Crash Investigation: 12 જૂન, 2025ના રોજ અમદાવાદમાં બનેલી વિમાન દુર્ઘટના બાદ તપાસ એજન્સીઓએ તમામ પાર્ટ્સનું વિશ્લેષણ કરવાનો નિર્ણય કર્યો છે. શરૂઆતમાં વિમાનના પાર્ટ્સ વિદેશ મોકલવાની વાત હતી, પરંતુ હવે નિર્ણય લેવાયો છે કે તમામ કાટમાળ અમદાવાદ એરપોર્ટ પાસે આવેલા ગુજસેલ (ગુજરાત સ્ટેટ એવિએશન ઇન્ફ્રાસ્ટ્રક્ચર લિમિટેડ) ખાતે જ લાવવામાં આવશે. અહીં વિમાનના તમામ ભાગોને મૂળ સ્ટ્રક્ચર પ્રમાણે ગોઠવાશે.
પોલીસ એસ્કોર્ટ દ્વારા પાર્ટ્સનું પરિવહન
મેઘાણીનગર દુર્ઘટના સ્થળેથી વિમાનનો કાટમાળ અલગ અલગ વાહનો દ્વારા પોલીસ એસ્કોર્ટ સાથે ગુજસેલ ખાતે પહોંચાડવામાં આવી રહ્યો છે. તમામ અવશેષોને ગુજસેલની ભાડેથી લેવાયેલી જગ્યાએ જમા કરવામાં આવી રહ્યા છે, જ્યાં વિમાનના ભાગોને ક્રમબદ્ધ રીતે ગોઠવવામાં આવશે.
પ્લેનના તમામ ભાગોની વિગતવાર તપાસ થશે
સૂત્રો અનુસાર, દુર્ઘટનાના સ્થળેથી વિમાનનો નાનામાં નાનો ટુકડો પણ તપાસ માટે ગુજસેલ ખાતે લાવવામાં આવશે. ત્યાં અલગ અલગ એજન્સીઓ તપાસ કરશે અને દુર્ઘટનાના તમામ પાસાઓ પર અભ્યાસ થશે. તપાસ પૂર્ણ થયા બાદ વિમાનના અવશેષો એર ઈન્ડિયાને પરત કરવામાં આવશે.
દુર્ઘટનાના ત્રીજા દિવસે ટેલ ભાગમાં મૃતદેહ મળ્યો
વિમાનના કાટમાળને દૂર કરતી વખતે ત્રીજા દિવસે વિમાનના ટેલ ભાગમાં એક એર હોસ્ટેસનો મૃતદેહ મળ્યો હતો. મૃતદેહને કાઢવા માટે NDRF અને ફાયર વિભાગના જવાનોએ કટર મશીનનો ઉપયોગ કર્યો. આ દૃશ્યએ તમામને સ્તબ્ધ કરી દીધા હતા.
અમદાવાદ પ્લેન ક્રેશ: 270 લોકોનાં કરુણ મોત
12 જૂન, 2025ના રોજ અમદાવાદ એરપોર્ટથી લંડન જતી ફ્લાઈટ ટેક-ઓફ થયા બાદ જ દુર્ઘટનાગ્રસ્ત થઈ હતી. વિમાનમાં સવાર 242 લોકોમાંથી 241 સહિત જમીન પર રહેલા 29 લોકોનાં કરુણ મોત થયાં હતાં. દુર્ઘટનાએ આખી દુનિયાને ચોંકાવી દીધી હતી.
દુર્ઘટનાની દુઃખદ ઘટનાઓ
વિમાન દુર્ઘટનાએ માત્ર વિમાનમાં જ નહીં, પરંતુ મેઘાણીનગરમાં મેડિકલ કોલેજ હોસ્ટેલમાં પણ અનેક જીવ લીધાં હતાં. મૃતદેહો એટલા બળી ગયા હતા કે ઓળખી શકાય તેમ ન હતા. આ દુર્ઘટના અમદાવાદના ઈતિહાસમાં સૌથી ભયાનક દુર્ઘટના તરીકે નોંધાઈ.
તપાસ પૂર્ણ થાય ત્યાં સુધી તમામ અવશેષ ગુજસેલમાં જ રહેશે
વિમાનનો કાટમાળ, એન્જિનના પાર્ટ્સ, વિંગ અને અન્ય તમામ અવશેષો ગુજસેલ ખાતે રાખી જરૂરી તપાસ કરવામાં આવશે. તપાસ પૂર્ણ થયા બાદ તમામ સામગ્રી એર ઈન્ડિયાને પરત કરવામાં આવશે.
