અમદાવાદના બાપુનગર વિસ્તારમાં આવેલા ગુજરાત બોટલિંગ પાસેથી બાઇક પર આવેલા બે શખ્સ રૂ. 12.92 લાખ ભરેલી બેગની લૂંટ કરી ફરાર થઈ ગયા હતા. ભંગારના કારખાનાનો કર્મચારી રૂપિયા ભરેલી બેગ એક્ટિવાની સીટ પર રાખી હુકમાંથી દવાની થેલી લેવા જતાં હાથ પરથી બેગ ખેંચી લૂંટ કરી ફરાર થઈ ગયા હતા. કર્મચારીએ બુમાબુમ કરી પીછો કર્યો પણ લૂંટારુઓ નાસી જવામાં સફળ રહ્યા હતા. બાપુનગર પોલીસે સીસીટીવી ફુટેજના આધારે લૂંટારુઓની શોધખોળ શરૂ કરી છે.
ગુજરાત બોટલિંગ પાસે લૂંટ
શાહીબાગ કિરણ એપાર્ટમેન્ટમાં રહેતા અને બાપુનગર ગુજરાત બોટલિંગ પાસે મણિયાર ગલીમાં ઈરાકી એન્ટરપ્રાઈઝ નામના ભંગારના કારખાનામાં અવિનાશ નાઈક નોકરી કરે છે. તેઓ પૈસાની ઉઘરાણી કરવાનું કામ કરે છે. શનિવારે સવારે તેઓ રાબેતા મુજબ બાપુનગર ખાતે નોકરીએ ગયા હતા. બપોરે ત્રણ વાગ્યે તેમના શેઠના દીકરાએ ફોન કરી અવિનાશને કહ્યું હતું કે નરોડા- દહેગામ રોડ પર આવેલી દવાની દુકાન પરથી દવા લઈ આવો જેથી તેઓ એકિટવા લઇ દવા લેવા ગયા હતા. શેઠના દીકરાને ફોન પર દવાની દુકાન પર વાત કરાવી દવા લઇ પરત ફરતા હતા. દરમ્યાનમાં કારખાનાના મેનેજર હબીબુલા અન્સારીએ ફોન કરી કહ્યું હતું કે, બાપુનગર આંગડિયા બજારમાંથી બે પેઢીમાંથી પૈસા લઈને આવજો.
12.92 લાખ ભરેલી થેલી હાથમાંથી ઝૂંટવી લૂંટારૂ ફરાર
જેથી અવિનાશ આંગડિયા બજારમાં આવેલી બે પેઢીમાંથી કુલ રૂ. 12.92 લાખ લઇ અને બેગમાં મૂકી અને ગુજરાત બોટલિંગ રોડ પર કારખાનાના ગેટ પાસે પહોંચ્યા હતા. તેઓએ રૂ. 12.92 લાખ ભરેલી બેગ સીટ પર મૂકી હતી. બેગ મૂકી અને હાથ રાખી તેઓ એક્ટિવાના હુકમાં ભરાવેલી દવાની થેલી લેવા ગયા ત્યારે બાઇક પર આવેલા બે શખ્સ નજીક આવી અને રૂપિયા ભરેલી બેગ લઈ અને ફરાર થઈ ગયા હતા. જેથી અવિનાશભાઈ તેમની પાછળ દોડ્યા હતા. બુમાબુમ કરતાં આસપાસના લોકો ભેગા થઈ ગયા હતા. પોલીસને જાણ કરવામાં આવતા બાપુનગર પોલીસ ઘટનાસ્થળે પહોંચી હતી. પોલીસે ગુનો નોંધી આસપાસના સીસીટીવી ફુટેજના આધારે તપાસ શરૂ કરી છે.
