અમદાવાદ શહેરમાં માસ્કના દંડને લઈ હવે પોલીસને ટાર્ગેટ આપવામાં આવ્યો છે. માસ્કના દંડને લઈ પોલીસકર્મીઓ લોકો પર રોફ જમાવી મારામારી પર ઊતરી આવે છે. ખોખરા પોલીસ સ્ટેશનમાં ફરજ બજાવતા પોલીસકર્મીએ નારોલ વિસ્તારમાં પોતાની જ સોસાયટીમાં ફરતી એક વ્યક્તિને માસ્કના નામે રોકી તેની સાથે બોલાચાલી કરી હતી, બોલાચાલી કરી પોલીસનો રોફ જમાવી લાકડી વડે ઢોર માર મારનાર પોલીસકર્મી ભરત ભરવાડ હોવાનું જણાયું છે. હાજર સિક્યોરિટી ગાર્ડ અને વ્યક્તિએ વચ્ચે પડી છોડાવ્યો હતો. પોલીસકર્મીની દાદાગીરીની માર મારવાની સમગ્ર ઘટના સીસીટીવી કેમેરામાં કેદ થઈ ગઈ હતી. હવે આ મામલે ઝોન 5 ડીસીપીએ એસીપીને તપાસ સોંપી છે.
ફરી એક વખત અમદાવાદ પોલીસની દાદાગીરી સામે આવતા કાયદાના રક્ષક જ કાયદો તોડીને ધજાગરા ઉડાવ્યા છે. અમદાવાદના ખોખરા પોલીસ સ્ટેશનમાં ડ્રાઈવર તરીકે નોકરી કરતા પોલીસકર્મીએ પોતાનો રોફ જમાવવા માટે એક સોસાયટીના સિક્યુરિટી સુપરવાઇઝરને ઢોર માર માર્યો છે. પહેલા તો પોલીસકર્મીએ માસ્ક કેમ નથી પહેર્યું તેમ કહીને સુપરવાઈઝરને માર માર્યો હતો. આ સાથે જ દબાણપૂર્વક ગાડીમાં બેસાડવાનો પણ પ્રયાસ કર્યો હતો.
અમદાવાદ પોલીસની આ દાદાગીરીની ઘટનાનો વીડિયો સોશિયલ મીડિયામાં વાયરલ થયો હતો. વાયરલ વીડિયોમાં દેખાતા પોલીસ કર્મી ભરતભાઇ ભરવાડ હોવાની ચર્ચા પણ ચાલી રહી છે. ભરતભાઇ ભરવાડ ખોખરા પોલીસ સ્ટેશનમાં ડ્રાઈવર તરીકેની ફરજ બજાવવાની પણ ચર્ચા છે. ત્યારે અનેક સવાલો ઉભા થઈ રહ્યા છે.
આ બાબતનો વિડિઓ વાયુવેગે વાયરલ થઈ જતા ઝોન-5 ના ડીસીપી એ તપાસના આદેશ આપી દીધા હતા જે તપાસના અંતે ખોખરા પોલીસ સ્ટેશન ના કોન્સ્ટેબલ ભરત ભરવાડ ને સસ્પેન્ડ કરવાનો ઓર્ડર ઝોન-5 ડીસીપી એ કર્યો છે.
