પુત્ર મહિને એક લાખ રૂપિયા કમાય છે પરંતુ છેલ્લાં બાર વર્ષથી માતાને તરછોડી છે : રજૂઆત

અમદાવાદના 72 વર્ષીય વૃદ્ધાએ ફેમિલી કોર્ટમાં અરજી કરી રજૂઆત કરી છે કે તેમના બે પુત્રો તેમને છેલ્લાં 12 વર્ષથી બોલાવતા નથી અને કોઇ પ્રકારની આર્થિક મદદ કરતા નથી. ફેમિલી કોર્ટે આ અંગે ફોજદારી અરજી નોંધી વધુ સુનાવણી બીજી માર્ચના રોજ મુકરર કરી છે. અમદાવાદના નવા વાડજ વિસ્તારમાં રહેતા શાંતાબહેન માધવલાલ પટેલની રજૂઆત છે કે તેમને સંતાનમાં હાલ ત્રણ દીકરા અને એક દીકરી છે. હાલ તેઓ વચ્ચેના દીકરા સાથે રહી રહ્યા છે. તેમના પતિએ વર્ષ 1971માં ઝવેરીવાડમાં ફરસાણની દુકાન કરી હતી અને વર્ષ 1985માં તેમનું મૃત્યુ થયું હતું. ત્યારબાદ તેના સૌથી મોટા દીકરાએ દુકાન સંભાળી હતી. દુકાને બેઠાના થોડા વર્ષોમાં દુકાનનો કબજો તેણે મેળવ્યો હતો. હાલ આ પુત્ર મહિને રૂપિયા એક લાખની કમાણી કરે છે, જ્યારે નાનો પુત્ર પણ મહિને રૂ. 75 હજારથી 80 હજારની કમાણી કરે છે પરંતુ તેઓ છેલ્લાં 12 વર્ષથી તેમની માતાને બોલાવતા નથી અને માતાનો કોઇ ખર્ચ ઉઠાવતા નથી. અરજદાર વૃદ્ધાના જમાઇનું મૃત્યુ થયું હોવાથી પુત્રીના નિભાવનો ખર્ચ પણ તેમના પર છે. બન્ને પુત્રો સારી એવી કમાણી કરતા હોવા છતાં માતાને કોઇ આર્થિક મદદ કરી રહ્યા નથી ઉપરાંત કોઇ સારાં-નરસા પ્રસંગમાં પણ માતાને બોલાવતા નથી. તેમણે કેટલાંક ઓપરેશન કરાવ્યા છે અને ઉંમર સહજ બીમારીઓના કારણે દવાનો ખર્ચો પણ ઘણો આવે છે. આ અંગે અરજદાર વૃદ્ધા દ્વારા પ્રિ-લિટિગેશન અરજી કરવામાં આવી હતી. પ્રિ-લિટિગેશનની અરજીની નોટિસમાં પ્રતિવાદી પુત્રો હાજર ન થતા ફેમિલી કોર્ટ દ્વારા કેસ રજિસ્ટર કરવામાં આવ્યો છે.