અમદાવાદમાં ગાડી કોન્ટ્રાક્ટમાં ભાડે લેવાના બહાને ગીરવે મૂકી છેતરપિંડી કરનાર 3 આરોપી વિરુધ્ધ કુલ 4 ફરિયાદ નોંધાઈ હોવાનું કૌભાંડ સામે આવ્યું છે. પોલીસે 3 આરોપીની ધરપકડ પણ કરી છે. સાથે સાથે છેતરપિંડીના ગુનામાં બેદરકારી દાખવનાર પોલીસ ઈન્સપેક્ટર પી.ડી.દરજી ને સસ્પેન્ડ કરવામાં આવ્યા છે. જોકે ગુનાના મુળ સુધી પહોંચવા માટે એસીપીને તપાસ સોંપવામાં આવી છે. સેટેલાઈટ પોલીસે એક કૌભાંડમાં ત્રણ લોકોની ધરપકડ કરી છે. ભરતસિંહ સોલંકી, પાર્થ ઓડ અને કૌશલસિંહ ઉર્ફે મુન્નો ગોહિલ નામના આ ત્રણ વ્યક્તિઓ સામે કુલ ચાર ફરિયાદ નોંધાઈ છે. આ ત્રીપુટીએ વોડાફોનના કોન્ટ્રાક્ટમાં ગાડી મુકવાના બહાને 15 લોકો પાસેથી ગાડી મેળવી લીધી હતી અને ગાડીનું ન તો ભાડું ચૂકવ્યુ કે ન તો કોઈ વળતર આપ્યુ હતું.
પરંતુ જ્યારે ફરિયાદીએ તપાસ કરી ત્યારે જાણવા મળ્યુ કે કોન્ટ્રાક્ટ માટે લીધેલી ગાડી ગીરવે મુકવામાં આવી છે. જેથી દોઢ મહીના પહેલા પોલીસને અરજી કરી તપાસ માટે જાણ કરવામાં આવી હતી. પરંતુ પોલીસે તપાસ હાથ ધરી ન હતી. જેથી ઉચ્ચ પોલીસ અધિકારીને ધ્યાને આ વાત આવતા પોલીસે ફરિયાદ નોંધવા આદેશ કર્યો હતો. જેમા એક જ દિવસમાં 4 ફરિયાદ નોંધાઈ છે. સેટેલાઈટ અને વાસણા પોલીસે ગાડીની છેતરપિંડી અંગે તપાસ કરતા પાર્થ ઓડ કોન્ટ્રાક્ટના નામે ગાડી મેળવતો અને બાદમાં ભરત ગોહિલ અને કૌશલ ગોહિલને ગીરવે આપી દેતો હતો. આરોપીએ આવી એક બે નહી પરંતુ 15 ગાડીઓની છેતરપિંડી કરી હોવાનું પોલીસ તપાસમાં સામે આવ્યુ છે. જેથી પોલીસે ગીરવે મુકેલી ગાડી કબ્જે કરવાની તજવીજ હાથ ધરી છે. પરંતુ ગુનામાં સૌથી મોટી બેદરકારી સેટેલાઈટ પોલીસ મથકના પીઆઈ પી ડી દરજીની છે. જેમણે દોઢ મહિના પહેલા મળેલી અરજીની તપાસ જ શરૂ કરી ન હતી. જેથી તેમને સસ્પેન્ડ કરી એસીપી એન ડિવીઝન દિવ્યા રવિયાને કેસની તપાસ સોંપવામાં આવી છે.
દિપન સોની નામના વેપારીએ સૌથી પહેલા ગાડીની છેતરપિંડીની અરજી કરી હતી. પરંતુ જેની તપાસ ન થતા આરોપીની હિમ્મત ખુલી અને એક બાદ એક 15 ગાડી ગિરવે મુકી દેવામાં આવી હતી. પરંતુ આ ગાડીમાં કોઈ વકિલ અને બે પોલીસ કર્મચારીની પણ સંડોવણી સામે આવી છે જે અંગે પોલીસે તપાસ આરંભી છે.
