મોલ અને મલ્ટીપ્લેક્સ ગ્રાહકોને મફત પાર્કિંગ આપવા તૈયાર જ નથી

ટ્રાફિક અને પાર્કિંગની સમસ્યા નિવારવા અમદાવાદ પોલીસે હાઇકોર્ટના નિર્દેશ બાદ શરૂ કરેલી ઝુંબેશના ભાગરૂપે શોપિંગ મોલ અને મલ્ટિપ્લેક્સમા આવતા વાહન ચાલકોને મફત પાર્કિંગની સુવિધા આપવા દેશ આપ્યો હતો. જેને મોલ અને મલ્ટિપ્લેક્સના માલિકોએ ગુજરાત હાઇકોર્ટમાં પડકાર્યો હતો. હાઈકોર્ટે તમામ પક્ષોને સાંભળ્યા બાદ મોલ અને મલ્ટિપ્લેક્સમાં આવતા ગ્રાહકોને પ્રથમ કલાક મફત પાર્કિંગની સુવિધા આપવા આદેશ આપ્યો હતો. જોકે આ આદેશથી નારાજ કેટલાક મલ્ટિપ્લેક્સ માલિકોએ ગુજરાત હાઇકોર્ટમાં અપીલ કરી હાઇકોર્ટના આદેશને પડકાર્યો છે. ગુજરાત હાઇકોર્ટના સિંગલ જજ દ્વારા આદેશ આપવામાં આવ્યો હતો કે રાજ્ય સરકારે પાર્કિંગ માટે કોઈ પોલિસી બનાવી નથી તેના કારણે ગ્રાહકોને સાવ મફત પાર્કિંગની સુવિધા પૂરી પાડી શકાય નહીં. આમ છતાં મોલ અને મલ્ટિપ્લેક્સમાં આવતા ગ્રાહકોને પહેલો કલાક મફત સુવિધા આપવી પડશે. ત્યારબાદના કલાક માટે ટુ વ્હીલરને રૂપિયા 20 અને કારના રૂપિયા 30 પાર્કિંગ ફી પેટે વસૂલી શકાશે. હાઇકોર્ટના સિંગલ જજના હુકમને આજે મંગળવારના રોજ મલ્ટિપ્લેક્સ મોલ માલિકોએ ડિવિઝન બેંચ સામે પડકાર્યો છે. તેમની રજૂઆત છે કે પહેલો કલાક મફત પાર્કિંગની સુવિધા આપવાના હાઈકોર્ટના આદેશ પહેલા તેમને સાંભળ્યા વગર અથવા તેમનો પક્ષ મૂકવાની તક આપ્યા વગર આદેશ આપવામાં આવ્યો છે. આથી સિંગલ જજના હુકમને રદ કરવામાં આવે. આ મામલે ડિવિઝન બેન્ચ તમામ પક્ષકારોને સાંભળ્યા પછી નિર્ણય કરશે.