અમદાવાદ 8.6 ડિગ્રી સાથે શુક્રવાર બન્યો સૌથી ઠંડો દિવસ

રાજ્યભરમાં તીવ્ર ઠંડીનું મોજુ ફરી વળતાં જનજીવન પ્રભાવિત થયું છે. હજુ લોકોને કડકડતી ઠંડીમાંથી છૂટકારો મળે તેવા કોઈ અણસાર નથી. હવામાન વિભાગ દ્વારા આગામી 72 કલાક સુધી કોલ્ડવેવની આગાહી કરવામાં આવી છે. તે જોતાં આવનારા સમયમાં હજુ ઠંડીનું મોજું વધશે તેવા અણસાર છે. રાજ્યનું સૌથી ઠંડું શહેર આજે ગાંધીનગર રહ્યું હતું જ્યાં તાપમાનનો પારો 8.0 ડિગ્રી સેલ્સિયસ પહોંચી ગયો હતો. જ્યારે અમદાવાદમાં ઠંડી 8.6 ડિગ્રી નોંધાતા આજનો દિવસ અમદાવાદ માટે સિઝનનો સૌથી ઠંડો દિવસ બની રહ્યો હતો. જ્યારે ભૂજમાં ઠંડી સાથે ભારે ધુમ્મસ જોવા મળ્યું હતું.
રાજ્યમાં જાન્યુઆરીની શરૃઆતમાં જ ઠંડીનો ચમકારો અનુભવાયા બાદ તાપમાનનો પારો ગગડતાં ઠંડીનું પ્રમાણ વધ્યું છે. અમદાવાદ સહીત રાજ્યના અનેક શહેરોમાં તિવ્ર ઠંડીના કારણે જનજીવન ખાસ્સું એવું પ્રભાવિત થયું છે. હજુ ત્રણ-ચાર દિવસ સુધી લોકોને ઠંડીમાંથી રાહત મળે તેવા કોઈ અણસાર નથી. આગામી 72 કલાક સુધી કોલ્ડવેવની હવામાન વિભાગે આગાહી કરતાં ઠંડીના પ્રમાણમાં હજુ વધારો થશે. રાજ્યમાં શિયાળાની જમાવટ બાદ કાતિલ ઠંડીમાં લોકો ઠુંઠવાઈ રહ્યા છે. ગરમ કપડાના બજારમાં તડકો જોવા મળી રહ્યો છે.