અમદાવાદમાંથી પકડાયો ગજબનો ચોર, દિવસે ધંધો કરતો અને રાત્રે ચોરી

માણસ મજબૂરીમાં જ ચોર બને તેવું જરુરી નથી, કેટલાક લોકો માત્ર હાઈફાઈ લાઈફ જીવવા પણ અવળા રસ્તે ચઢી જતા હોય છે, અને આવો જ એક કિસ્સો અમદાવાદમાં સામે આવ્યો છે, જેમાં પોલીસે 48 વર્ષના એક ચોરની ધરપકડ કરી છે. આ ચોર પોતાની રેસ્ટોરાં ધરાવે છે, અને લગ્નપ્રસંગમાં ડીજે મોકલી આપવાનો બિઝનેસ કરતો હતો. જોકે, રાત પડે તે ચોર બની જતો.
વેજલપુર વિસ્તારમાં આવેલા વૃંદાવન ગ્રીન અપાર્ટમેન્ટમાં રહેતા સુરેશ મકવાણા (ઉં. 48 વર્ષ)ની છાપ પાડોશીઓમાં એક વેપારી તરીકેની હતી. જોકે, તે ચોરીના આરોપમાં જેલમાં પણ જઈ આવ્યો છે. તે જ્યારે પણ જેલમાં જતો ત્યારે પોતે કામને લીધે બહારગામ ગયો હતો તેમ કહી પાડોશીઓને પણ ઉલ્લુ બનાવતો.
નવાઈની વાત એ છે કે, રીઢો ઘરફોડિયો સુરેશ એટલી બધી ચોરીઓને અંજામ આપી ચૂક્યો છે કે, તાજેતરમાં જ તેણે પોતાના દીકરાને પરણાવ્યો હતો, અને તેમાં તેને ચોરીના રુપિયે જ ખરીદેલી i20 કાર ગિફ્ટ કરી હતી. આ કાર ચોરીના રુપિયે ખરીદાઈ હોવાથી પોલીસે તેને પણ જપ્ત કરી છે.
એક પોલીસ અધિકારીના જણાવ્યા અનુસાર, સુરેશ મકવાણા ચોરીના આરોપમાં જેલમાં જઈ આવ્યો છે, અને તે થોડા જ દિવસોમાં જામીન લઈ બહાર આવી જતો. તે રાત્રે ચોરી કરવા પોતાની ગાડી નીકળતો, અને સાથે માત્ર સ્ક્રૂ ડ્રાઈવર અને ડંડો રાખતો. દિવસે રેકી કરી જે બંધ બંગલા તેણે નક્કી કર્યા હોય તેમાં રાત્રે બારીની ગ્રીલને પહોળી કરી સુરેશ તેમાં ઘૂસી જતો.
શનિવારે રાત્રે સુરેશ તેના પાડોશી અને બે નંબરના ધંધાના ભાગીદાર પ્રકાશ સોની સાથે તેણે ચોરેલા સોનાને ઓગાળવા જઈ રહ્યા હતા, પરંતુ તેમને ખબર નહોતી કે પોલીસ તેમની પાછળ છે. શનિવારે જ પોલીસે સુરેશની ગાડીનો પીછો કરી તેની તપાસ કરતા તેમાંથી 13 લાખ રુપિયાની કિંમતના દાગીના અને સાડા ત્રણ હજાર અમેરિકન ડોલર મળ્યા હતા.
સુરેશ અને પ્રકાશને પૂછપરછ માટે ક્રાઈમ બ્રાંચ લવાયા હતા, તેમણે કરેલા ખુલાસાથી પોલીસને માહિતી મળી હતી કે, સુરેશ રીઢો ઘરફોડિયો છે, અને પ્રકાશ પણ તેનો સાથી છે. તેમની પાસેથી જે દાગીના અને ડોલર મળ્યા તે પણ એક અઠવાડિયા પહેલા થલતેજ વિસ્તારમાં આવેલા આસોપાલવ બંગ્લોઝમાંથી ચોર્યા હોવાની પણ સુરેશે કબૂલાત કરી હતી.