chandola lake demolition : અમદાવાદના ચંડોળા તળાવ વિસ્તારમાં ઘૂસણખોરો સામે તંત્રની મેગા કાર્યવાહી
chandola lake demolition : અમદાવાદ શહેર આજે એક અભિયાનનું સાક્ષી બની રહ્યું છે. દાણીલીમડા રોડ પાસે આવેલો ચંડોળા તળાવ વિસ્તાર, જેને લોકભાષામાં ‘મિની બાંગ્લાદેશ’ તરીકે ઓળખવામાં આવે છે, ત્યાં સરકાર અને શહેર તંત્રએ સૌથી મોટું ‘ઓપરેશન ક્લીન’ હાથ ધર્યું છે.
આ કાર્યવાહી જમ્મુ-કાશ્મીરના પહેલગામમાં થયેલા આતંકી હુમલા બાદ શરૂ થયેલી દેશવ્યાપી ઝુંબેશનો એક ભાગ છે, જેમાં ગેરકાયદેસર રહેતા લોકો સામે કડક પગલાં ભરાયા છે. ગુજરાત સરકારે પણ આ બાબતમાં સખત વલણ દાખવ્યું છે.
મેગા ડિમોલિશન ઑપરેશન: ચંડોળા પર બુલડોઝર ત્રાટકી
ચંડોળા તળાવ આસપાસ વર્ષોથી ગેરકાયદે વસવાટ કરતા લોકો વિરુદ્ધ પોલીસ અને અમદાવાદ મ્યુનિસિપલ કોર્પોરેશન (AMC) એ મળીને વિશાળ લેવલનું મેગા ઓપરેશન શરૂ કર્યું છે. ગેરકાયદે ઉભેલા ઝૂંપડપટ્ટીઓ અને બાંધકામો પર આજે સવારે બુલડોઝર ફરી વળ્યાં. આખા વિસ્તારને ખાલી કરાવવા માટે 60 જેટલા JCB મશીનો અને એટલાજ ડમ્પરનો ઉપયોગ કરવામાં આવી રહ્યો છે.
ક્રાઈમ બ્રાંચ સહિત અન્ય અધિકારીઓ દ્વારા મકાનોનું તાળું તોડી ચેકિંગ હાથ ધરાયું છે જેથી ડિમોલિશન પહેલા કોઈ શંકાસ્પદ વસ્તુ મળી આવે તો તેને જપ્ત કરી શકાય. સુરક્ષા માટે 2000થી વધુ પોલીસકર્મીઓ તૈનાત કરવામાં આવ્યા છે, જ્યારે AMCની હેલ્થ ટીમ પણ જરૂરિયાત મુજબ તૈયાર રાખવામાં આવી છે.
લલ્લા બિહારીનું ફાર્મહાઉસ પણ નાશ પામ્યું
ચંડોળા તળાવના કિનારે લલ્લા બિહારી નામના એક શખ્સે વર્ષો પહેલાં પચાવી પાડેલી સરકારી જમીન પર ભવ્ય ફાર્મહાઉસ બાંધ્યું હતું. તેમાં ગાર્ડન, ફુવારા, એસી રૂમ્સ, કિચન અને ચિલ્ડ્રન પ્લે એરિયા જેવી સગવડો ઊભી કરવામાં આવી હતી. તંત્રની કામગીરી દરમિયાન હવે તેનું આખું ફાર્મહાઉસ જમીનદોસ્ત કરવામાં આવ્યું છે.
ચંડોળા તળાવ વિસ્તારનું વાસ્તવિક ચિત્રણ
ચંડોળા તળાવ વિસ્તાર લગભગ 1200 હેક્ટર જમીન પર ફેલાયેલો છે. અહીં પશ્ચિમ બંગાળથી આવીને વસેલા ઘણા મુસ્લિમ પરિવારોથી લઈને બાંગ્લાદેશી ઘૂસણખોરો સુધી વસવાટ કરે છે. આ વિસ્તાર ગેરકાયદે પ્રવૃત્તિઓ માટે પણ ક્યારેક ચર્ચામાં રહે છે. તળાવ આસપાસની ગલીઓ ખૂબ જ સાંકડી છે અને ગંદકીથી ભરેલી રહે છે. ઘણી જગ્યાએ તો સાઇકલ પસાર થાય એ પણ મુશ્કેલ બને એવી પરિસ્થિતિ છે.
સરકારની દ્રષ્ટિ અને આગળની રીત
ગુજરાત સરકારનો ઉદ્દેશ માત્ર ગેરકાયદે વસવાટ કરનારો વિસ્તારો ખાલી કરાવવાનો જ નહીં, પરંતુ આવા વિસ્તારોમાં શાંતિ અને વ્યવસ્થા જાળવવાની છે. તંત્ર દ્વારા સ્પષ્ટ સંદેશ આપવામાં આવ્યો છે કે કાયદાની રેખાને ઓળંગનારા કોઈપણ તત્વોને હવે છોડવામાં નહિ આવે.
