Chlorotoluene Plant Gujarat: ગુજરાતમાં દેશનો સૌથી મોટો ક્લોરોટોલ્યુન પ્લાન્ટ દહેજમાં શરૂ, 1,000 નોકરીઓની તક ઉભી થશે
Chlorotoluene Plant Gujarat : ગુજરાતના દહેજમાં દેશનો સૌથી મોટો ક્લોરોટોલ્યુન પ્લાન્ટ સ્થાપિત કરવામાં આવ્યો છે, જે ગુજરાત આલ્કલીઝ એન્ડ કેમિકલ્સ લિમિટેડ (GACL) નું મહત્વાકાંક્ષી પ્રોજેક્ટ છે. મુખ્યમંત્રી ભૂપેન્દ્ર પટેલના હસ્તે આ પ્લાન્ટનું વર્ચ્યુઅલ ઉદ્ઘાટન કરવામાં આવ્યું, જે રૂ. 350 કરોડના ખર્ચે બનાવાયો છે.
આ પ્લાન્ટ દ્વારા દર વર્ષે 30,000 ટન ક્લોરોટોલ્યુન ઉત્પાદિત થશે, જે આંતરરાષ્ટ્રીય સ્તરે યુરોપ, અમેરિકા અને દક્ષિણ એશિયાના બજારોમાં નિકાસ કરવામાં આવશે. આ પ્રોજેક્ટ માત્ર ગુજરાત માટે જ નહીં, પરંતુ સમગ્ર દેશ માટે એક મહત્ત્વનો ઉદ્યોગિક પગથિયો સાબિત થશે.
હજાર જેટલી નોકરીઓની તકો
આ નવીન પ્લાન્ટની સ્થાપનાથી અંદાજે 1,000 લોકોને પ્રત્યક્ષ અને પરોક્ષ રીતે રોજગાર મળશે. દહેજ જેવા ઉદ્યોગિક હબમાં આ પ્રકારના મહત્વપૂર્ણ કેમિકલ ઉદ્યોગના વિકાસ સાથે નવી તકો ઉભી થશે, જે સ્થાનિક યુવાઓ માટે રોજગારના નવા દરવાજા ખોલશે.
GACL અને તેનું ઉદ્યોગિક યોગદાન
GACL 1973થી વિવિધ કેમિકલ્સ અને ઉદ્યોગસર્જક ઉત્પાદનોની મેન્યુફેક્ચરિંગમાં પ્રમુખ ભૂમિકા ભજવી રહ્યું છે. દહેજ અને વડોદરામાં સ્થિત પ્લાન્ટ્સ મારફતે કંપની કોસ્ટિક સોડા સહિત 35થી વધુ પ્રકારના કેમિકલ્સનું ઉત્પાદન કરે છે.
GACLએ વર્ષોથી સતત ઉત્પાદન ક્ષમતા વધારવા સાથે નવા નવા પ્રોડક્ટ્સ વિકસાવ્યા છે. આજે, તે ભારતમાં સોડિયમ ક્લોરેટ અને હાઈડ્રેઝિન હાઈડ્રેટનું એકમાત્ર ઉત્પાદન એકમ ધરાવે છે, જે તેને ઉદ્યોગજગતમાં એક આગવી ઓળખ અપાવે છે.
આ નવો ક્લોરોટોલ્યુન પ્લાન્ટ ગુજરાતના ઉદ્યોગિક વિકાસ માટે એક મહત્વપૂર્ણ સિદ્ધિ છે. તે માત્ર રોજગાર વધારશે નહીં, પણ વિદેશી હૂંડિયામણ લાવવા અને કેમીકલ ઉદ્યોગમાં ભારતની ગ્લોબલ પોઝિશન મજબૂત કરવાનું કાર્ય કરશે.
