Club O7 liquor party raid: ક્લબ O7માં નાઇટ પાર્ટી પરથી દારૂની મહેફિલ પકડાઈ, યુવતી સહિત 9 ઝડપાયા
Club O7 liquor party raid: અમદાવાદ શહેરના બોપલ વિસ્તારમાં આવેલી પ્રસિદ્ધ ક્લબ O7 ફરી એકવાર વિવાદમાં આવી છે. અહિયાં મોડી રાતે ચાલી રહેલી ટેક્નો મ્યુઝિક પાર્ટીમાં દારૂ પીવાની ગુપ્ત માહિતીના આધારે પોલીસએ કાર્યવાહી કરીને મોટા કાવતરાનો પર્દાફાશ કર્યો છે. પોલીસે ક્લબના પાર્કિંગ વિસ્તારમાંથી એક યુવતી સહિત કુલ 9 લોકોને ઝડપી પાડ્યા છે અને ઘટનાઓ સાથે જોડાયેલ કુલ 8.5 લાખ રૂપિયાનું કિંમતી સામાન જપ્ત કર્યું છે.
દારૂ, ડાન્સ અને વિલાસિતાની રાત્રિ
બોપલ પોલીસને મળેલી વિગતો અનુસાર, ક્લબ O7ના પાર્કિંગ વિસ્તારમાં દારૂની મહેફિલ ચાલતી હતી. અહીં ATC મેનેજમેન્ટ કંપની દ્વારા ટેક્નો મ્યુઝિક નાઈટનું આયોજન કરવામાં આવ્યું હતું જેમાં અંદાજે 200 લોકોએ હાજરી આપી હતી. જયારે પોલીસે રેડ કરી ત્યારે ઘણા યુવાનો શંકાસ્પદ લાગ્યા અને તપાસમાં 6 લોકો દારૂના નશામાં હોવાનું ખુલ્યું. અન્ય ત્રણ વ્યક્તિ પાસેથી દારૂની બોટલ મળી આવી.
ઝડપાયેલા આરોપીઓ અને કબજામાં લેવાયેલ માલ
આ કાર્યવાહી દરમિયાન રહેલા લોકોમાં રાહુલ ગોસ્વામી, હેમલ દવે, ભાવેશ પવાર, આશુતોષ શાહ, રાહુલ ચહલ, સની પંડ્યા, પૃથ્વીરાજ ડોડલા સહિત કુલ 9 લોકોની ધરપકડ કરાઈ છે. તેઓ પાસેથી પોલીસએ પાંચ મોબાઇલ ફોન, બે BMW કાર, એક હોન્ડા સિટી કાર અને દારૂની બોટલો મળી કબજે લીધી છે. તમામ મુદ્દામાલની કિંમત અંદાજે 8.5 લાખ રૂપિયા જણાઈ રહી છે.
હેમલ દવે વિરુદ્ધ નશાનો કેસ અને જાહેરનામા ભંગ
પ્રાથમિક તપાસમાં સામે આવ્યું છે કે પાર્ટીનું આયોજન હેમલ દવેએ કર્યું હતું. તેના વિરુદ્ધ દારૂ પીધેલો હોવાના આરોપસર કેસ નોંધવામાં આવ્યો છે. સાથે જ રાત્રિના 12:30 વાગ્યા સુધી મ્યુઝિક ચાલુ રાખવાને કારણે જાહેરનામાની અવગણનાનો પણ ગુનો દાખલ કરવામાં આવ્યો છે.
વધુ કાર્યવાહી ચાલુ
DYSP આસ્થા રાણાએ જણાવ્યું કે પાર્ટીમાં હાજર લગભગ 60-70 લોકો શંકાસ્પદ લાગતા તેમની પૂછપરછ કરવામાં આવી હતી. હાલમાં ક્લબના સંચાલક તેમજ પાર્ટીનું આયોજન કરનાર પક્ષની પણ પૂછપરછ કરવામાં આવી રહી છે. પોલીસ હવે તપાસની દિશામાં આગળ વધીને પાર્ટીના પાસ અને એન્ટ્રી સાથે જોડાયેલા અન્ય સંગઠનોને પણ ચકાસી રહી છે.
