CM Bhupendra Patel hospital visit: સીએમ પટેલે સિવિલ હોસ્પિટલની મુલાકાત લઈ ઈજાગ્રસ્તોની ખબર લીધી
CM Bhupendra Patel hospital visit: રાજ્યના પૂર્વ મુખ્યમંત્રી વિજય રૂપાણીના દુઃખદ અવસાનથી સમગ્ર ગુજરાત શોકમાં ગરકાવ થયું છે. રાજ્ય સરકાર દ્વારા તેઓને સરકારી માનદંડ અનુસાર ગાર્ડ ઓફ ઑનર અપાઈ શ્રદ્ધાંજલિ આપવામાં આવી. મુખ્યમંત્રી ભૂપેન્દ્ર પટેલ પણ શ્રદ્ધાંજલિ સમારોહમાં હાજર રહ્યા અને તેમનાં પરિવારજનોને સંપૂર્ણ સન્માન સાથે પાર્થિવ દેહ સોંપાયો.
આ દરમિયાન, મુખ્યમંત્રીએ અમદાવાદ સિવિલ હોસ્પિટલની મુલાકાત લઈ વિમાન દુર્ઘટનાના ઈજાગ્રસ્તોનું નિવેદન મેળવ્યું અને સારવાર હેઠળ રહેલા દર્દીઓ તથા તેમના સ્વજનોના દુઃખમાં સહભાગી બની તેમને સહાનુભૂતિ આપી.
રાજકીય નેતાઓ અને અધિકારીઓની પણ હાજરી
હોસ્પિટલ મુલાકાત દરમિયાન મુખ્યમંત્રી સાથે આરોગ્ય મંત્રી ઋષિકેશ પટેલ, ગૃહ રાજ્યમંત્રી હર્ષ સંઘવી, સહકાર મંત્રી જગદીશ વિશ્વકર્મા તથા રાજ્યસભાના સાંસદ મયંક નાયક સહિત અનેક ઉચ્ચ અધિકારીઓ અને સામાજિક નેતાઓ ઉપસ્થિત રહ્યા હતા. હોસ્પિટલના D2 બ્લોકમાં કાર્યરત વેરિફિકેશન રૂમ પણ મુખ્યમંત્રીએ જોયો હતો.
DNA મેપિંગ અને તાત્કાલિક રાહત અંગે સૂચનાઓ
મુખ્યમંત્રીએ ઈજાગ્રસ્તોની ઓળખ માટે ચાલી રહેલી ડીએનએ મેપિંગ પ્રક્રિયાની વિગતવાર સમીક્ષા કરી અને અધિકારીઓને સ્પષ્ટ સૂચના આપી કે તમામ દર્દીઓને તાત્કાલિક સારવાર, અને મૃતકોના પરિવારજનોને શ્રેષ્ઠ સહાય ઉપલબ્ધ કરાવાય.
રાહત-બચાવ કામગીરીની સમીક્ષા બેઠક
હોસ્પિટલ મુલાકાત પછી મુખ્યમંત્રીએ રાજ્યના ઉચ્ચ મંત્રીઓ અને અધિકારીઓ સાથે બેઠક યોજી હતી. અહીં વિમાન દુર્ઘટના પછી હાથ ધરાયેલી રાહત તથા પુનર્વસન કામગીરીની વિસ્તૃત સમીક્ષા કરવામાં આવી. તેમણે સ્પષ્ટ કહ્યું કે, દરેક પીડિત પરિવારને યોગ્ય મદદરાશિ, માનસિક સહાય અને પ્રશાસન તરફથી સતત સમર્થન મળવું જોઈએ.
આ બેઠકમાં આરોગ્ય મંત્રી, ગૃહ રાજ્યમંત્રી, મુખ્ય સચિવ પંકજ જોશી, રાજ્ય પોલીસ વડા વિકાસ સહાય, મ્યુનિસિપલ કમિશનર સહિત અનેક અધિકારીઓ હાજર રહ્યા હતા. તમામને રાહત કામગીરીમાં પારદર્શિતા અને ઝડપી કાર્યવાહી માટે સૂચના અપાઈ.
