Colonel of Kentucky Award : સેવાભાવી ગુજરાતીએ યુએસમાં રચ્યો ઈતિહાસ: મુકેશ પટેલને મળ્યો ‘કર્નલ ઓફ કન્ટુકી’ એવોર્ડ, વતનમાં પણ સન્માન
પલસાણા તાલુકાના એના ગામના મુકેશ પટેલને યુ.એસ.ના ગવર્નર દ્વારા ‘કર્નલ ઓફ કન્ટુકી’ એવોર્ડથી સન્માનિત કરાયા
સેવા અને સામાજિક કાર્યો માટે માન્યતાના રૂપમાં મુકેશ પટેલનું વતન એના ગામે ખાસ સન્માન કરવામાં આવ્યું
બારડોલી, સોમવાર
Colonel of Kentucky Award : યુ.એસ.માં ગુજરાતીએ ફરીથી શાન વધારી છે. પલસાણાના મુકેશ પટેલને તેમના સેવાભાવી સ્વભાવ અને સામાજિક કાર્યો માટે યુ.એસ.ના ગવર્નર દ્વારા પ્રતિષ્ઠિત ‘કર્નલ ઓફ કન્ટુકી’ એવોર્ડથી નવાજવામાં આવ્યા છે. આ ગૌરવપૂર્ણ સિદ્ધિ માટે તેમના વતન એના ગામમાં પણ હર્ષનો માહોલ જોવા મળ્યો હતો, જ્યાં ગ્રામજનો અને શાળાના સંચાલકોએ તેમની સિદ્ધિઓ માટે તેમનું વિશેષ સન્માન કર્યું.
મુકેશ પટેલ, જે મૂળ ખેડૂત પરિવારના સંતાન છે, 1996થી યુ.એસ.માં મોટેલ વ્યવસાય સાથે જોડાયેલા છે. તેમણે યુ.એસ.ને પોતાની કર્મભૂમિ બનાવતાં જ્યાંના વિદ્યાર્થીઓ માટે શૈક્ષણિક સહાય અને અન્ય સામાજિક કાર્યો દ્વારા સમાજમાં મહત્વપૂર્ણ યોગદાન આપ્યું છે. આ જ કારણે તેમને યુ.એસ.ના સર્વોચ્ચ સન્માનમાંના એક ગણાતા ‘કર્નલ ઓફ કન્ટુકી’ એવોર્ડથી સન્માનિત કરવામાં આવ્યા છે.
વતન પાછા ફર્યા બાદ, સરદાર પટેલ વિદ્યાલયમાં યોજાયેલા સમારંભમાં મુકેશ પટેલને ગ્રામજનો દ્વારા વધાવવામાં આવ્યા. તેમના કાર્ય અને સમર્પણને કારણે તેમણે ગામ અને સમગ્ર દેશનું નામ ગૌરવંતિત કર્યું છે.
