Disa Fire Investigation : IAS અધિકારીની અધ્યક્ષતામાં થશે ડીસા અગ્નિકાંડની તપાસ, 21 લોકોના મોત બાદ સરકારની કાર્યવાહી
Disa Fire Investigation : ડીસામાં મંગળવારે ફટાકડાની ફેક્ટરીમાં વિસ્ફોટ થયા બાદ ભયાનક આગ લાગતાં 21 મજૂરોના દયનીય મૃત્યુ થયા છે. આ ઘટનાને લઈ રાજ્ય સરકારે ગંભીર નોટિસ લીધી છે અને ખાસ તપાસ દળ (SIT)ની રચના કરી છે. આ ઘટનાને લઈને સ્થાનિક તંત્રની જવાબદારીઓ પર પણ સવાલો ઉઠી રહ્યા છે.
IAS અધિકારીના નેતૃત્વમાં SITની રચના
રાજ્ય સરકારે ડીસા આગકાંડની ઊંડાણપૂર્વક તપાસ કરવા માટે IAS ભાવિન પંડ્યાની અધ્યક્ષતામાં SITની રચના કરી છે. આ સમિતિમાં ખાસ સભ્યો તરીકે વિશાલકુમાર વાઘેલા (નાયબ પોલીસ મહાનિરીક્ષક), એચ. પી. સંઘવી (ડાયરેક્ટર, ફોરેન્સિક સાયન્સ લેબોરેટરી, ગાંધીનગર) અને જે.એ. ગાંધી (ચીફ એન્જિનિયર) સામેલ છે. આ SIT 15 દિવસની અંદર સમગ્ર ઘટનાની તપાસ કરી સરકાર સમક્ષ રિપોર્ટ રજૂ કરશે.
SIT દ્વારા તપાસના મુખ્ય મુદ્દાઓ:
વિસ્ફોટની ઘટનાનું કારણ અને સંજોગો શું હતા?
ફટાકડાની ફેક્ટરી માટે સત્તાવાર મંજૂરી લેવાઈ હતી કે નહીં?
વિસ્ફોટક સામગ્રી સંગ્રહ માટે નક્કી થયેલા નિયમોનું પાલન થયું હતું કે નહીં?
ફેક્ટરી એક્ટ 1948 અને એક્સપ્લોઝિવ એક્ટ 1884 હેઠળ જરૂરી પરવાનગીઓ લેવામાં આવી હતી કે નહીં?
ફેક્ટરીમાં કામદારો માટે શ્રમ કાયદા અને બાળશ્રમ સંબંધિત નિયમોનું પાલન થયું હતું કે નહીં?
ફાયર NOC તથા અન્ય સલામતી સંબંધિત મંજૂરીઓ લેવામાં આવી હતી કે નહીં?
સ્થાનિક તંત્ર દ્વારા આ ફેક્ટરીનું સમયાંતરે નિરીક્ષણ કરવામાં આવતું હતું કે નહીં?
આ દુર્ઘટનામાં કઈ વ્યક્તિઓ કે તંત્ર બેદરકાર હોવાનું સામે આવે છે?
ફેક્ટરી ગેરકાયદે ચલાવવામાં આવી રહી હતી?
તપાસ દરમિયાન ચોંકાવનારા ખુલાસા થયા છે. DIPAK TRADERS નામની આ ફેક્ટરીને ફટાકડા સંગ્રહ માટે લાયસન્સ આપવામાં આવ્યું હતું, પરંતુ તે ઉત્પાદન અને વેચાણ માટે ગેરકાયદે રીતે કાર્યરત હતી. વધુમાં, આ લાયસન્સની મુદત પણ સમાપ્ત થઈ ગઈ હતી, અને તેનું નવનીકરણ કરવામાં આવ્યું ન હતું.
પોલીસે ફેક્ટરી માલિક ખૂબચંદ અને તેના પુત્ર દીપક મોહનાનીની ધરપકડ કરી છે. ફટાકડાના ગોડાઉનમાં રહેલી વિસ્ફોટક સામગ્રીનું પંચનામું પણ કરવામાં આવ્યું છે. સરકાર તરફથી સ્પષ્ટ કરી દેવામાં આવ્યું છે કે જે લોકો પણ આ દુર્ઘટનામાં જવાબદાર હશે, તેમના પર કાયદાકીય પગલાં લેવાશે.
આ ઘટના રાજ્યમાં ફેક્ટરીઓ અને વિસ્ફોટક સામગ્રીના સંગ્રહ માટેની સુરક્ષા પર ગંભીર પ્રશ્નો ઉઠાવે છે. SITની રિપોર્ટ આવ્યા બાદ વધુ પગલાં લેવાશે, અને ભવિષ્યમાં આવી ઘટનાઓ ન બને તે માટે રાજ્ય સરકાર સાવચેતીના પગલાં લેશે.
