Gujarat Budget 2025: મહિલાઓ માટે ‘સખી સાહસ યોજના’ અને વર્કિંગ વુમન હોસ્ટેલ સહિત 5 મોટી જાહેરાત
ગુજરાતમાં બહારગામ નોકરી કરતી મહિલાઓ માટે અમદાવાદ, સુરત, વડોદરા, રાજકોટ અને ગાંધીનગરમાં વર્કિંગ વુમન હોસ્ટેલ બનાવાશે
સખી સાહસ યોજના હેઠળ મહિલાઓને સાધન સહાય, લોન ગેરંટી અને તાલીમ માટે રૂ. 100 કરોડનું ફંડ ફાળવાયું
Gujarat Budget 2025 : ગુજરાત સરકાર દ્વારા જાહેર કરાયેલા 2025-26ના બજેટમાં મહિલા સશક્તિકરણને કેન્દ્રસ્થાને રાખવામાં આવ્યું છે. નાણાંમંત્રી કનુભાઈ દેસાઈએ નવી ‘સખી સાહસ યોજના’ શરૂ કરવાની જાહેરાત કરી છે, જે માટે રૂ. 100 કરોડની ફાળવણી કરવામાં આવી છે.
રાજ્ય સરકારનું માનવું છે કે આધુનિક ગુજરાતના વિકાસમાં નારીશક્તિનો મહત્વપૂર્ણ ફાળો છે. આર્થિક સ્વતંત્રતા અને વ્યાવસાયિક તાલીમ દ્વારા મહિલાઓને આત્મનિર્ભર બનાવવાનું આ યોજનાનું મુખ્ય ઉદ્દેશ્ય છે. ‘સખી સાહસ યોજના’ અંતર્ગત મહિલાઓને સાધન સહાય, લોન ગેરંટી અને વ્યાવસાયિક તાલીમ આપવામાં આવશે.
બહારગામ નોકરી કરતી મહિલાઓ માટે વર્કિંગ વુમન હોસ્ટેલ
ગુજરાતમાં નોકરી કરતા અને પોતાના વતનથી દૂર રહેતી મહિલાઓ માટે સુરક્ષિત અને સુવિધાયુક્ત હોસ્ટેલ બનાવવાના પ્રસ્તાવને રાજ્ય સરકારે મંજૂરી આપી છે. અમદાવાદ, સુરત, વડોદરા, રાજકોટ અને ગાંધીનગર જેવા મહાનગરોમાં આ વર્કિંગ વુમન હોસ્ટેલ બનાવવામાં આવશે. આ પ્રોજેક્ટ માટે રૂ. 69 કરોડ ફાળવવામાં આવ્યા છે.
મહિલાઓ માટે બજેટમાં 5 મહત્વની જાહેરાતો:
સખી સાહસ યોજના – મહિલા સશક્તિકરણ માટે નવી યોજના, માટે રૂ. 100 કરોડની ફાળવણી.
વર્કિંગ વુમન હોસ્ટેલ – અમદાવાદ, સુરત, વડોદરા, રાજકોટ અને ગાંધીનગરમાં સુવિધાજનક હોસ્ટેલ બનાવવાની જાહેરાત.
પીએનજી-એલપીજી સહાય યોજના – ગેસ કનેક્શન માટે રાજ્ય સરકાર દ્વારા રૂ. 500 કરોડ ફાળવવામાં આવ્યા.
ગંગા સ્વરૂપા આર્થિક સહાય યોજના – વિધવા બહેનો માટે માસિક રૂ. 1250 સહાય માટે કુલ રૂ. 3015 કરોડની જોગવાઈ.
વ્હાલી દીકરી યોજના – કન્યાઓના ભવિષ્ય માટે સહાય માટે રૂ. 217 કરોડની ફાળવણી.
મુખ્યમંત્રી માતૃશક્તિ યોજના માટે ખાસ જોગવાઈ
સગર્ભા મહિલાઓના પોષણ માટે રાજ્ય સરકારે ‘મુખ્યમંત્રી માતૃશક્તિ યોજના’ હેઠળ 1000 દિવસ સુધી કિસાન અનાજ કીટ આપવા માટે રૂ. 372 કરોડ ફાળવ્યા છે. આ યોજનાથી સગર્ભા માતાઓને દર મહિને 2 કિલો ચણા, 1 કિલો દાળ અને 1 લીટર ખાદ્ય તેલ આપવામાં આવશે.
આ સિવાય, કિશોરીઓના કુપોષણ ઘટાડવા માટે ‘પૂર્ણા યોજના’ હેઠળ પૌષ્ટિક પેકેટ વિતરણ માટે રૂ. 335 કરોડ ફાળવવામાં આવ્યા છે.
આ બજેટ ગુજરાતના મહિલાઓ માટે એક મજબૂત ભવિષ્યના નિર્માણ તરફ એક મહત્વપૂર્ણ પગલું છે, જે તેમને શિક્ષણ, આરોગ્ય અને રોજગારના વધુ મોટા અવસર પૂરા પાડશે.
