Gujarat Foundation Day 2025: 1 મેના દિવસે ઉજવાય છે રાજ્યની શૌર્યગાથા, જાણો એની પાછળનો ઈતિહાસ
Gujarat Foundation Day 2025 દર વર્ષે 1 મેના રોજ ગુજરાતની ધરતી પોતાના સ્થાપન દિવસની ભવ્ય ઉજવણી કરે છે. ગુજરાત દિવસને રાજ્યભરના લોકો ઉત્સાહપૂર્વક મનાવે છે અને તેને ‘ગુજરાત ગૌરવ દિવસ’ તરીકે પણ ઓળખવામાં આવે છે. આ વર્ષે 2025માં, પંચમહાલ જિલ્લાના ગોધરા ખાતે રાજ્યપાલ અને મુખ્યમંત્રીની વિશેષ ઉપસ્થિતિમાં ગુજરાત દિવસની શાનદાર ઉજવણી યોજાનાર છે.
ગુજરાતના સ્થાપનાની પાછળ એક ઐતિહાસિક યાત્રા છે. ભારતના સ્વતંત્રતા પછી પશ્ચિમ ભારતના ઘણા રજવાડાંઓને ભેગા કરીને સૌરાષ્ટ્ર, કચ્છ અને મુંબઇ રાજ્યો બનાવવામાં આવ્યા હતા. પરંતુ 1956માં ‘રાજ્યોની પુનરરચના અધિનિયમ’ હેઠળ બૃહદ મુંબઇ રાજ્યનું સર્જન થયું જેમાં ગુજરાતી અને મરાઠી બોલતા વિસ્તારોએ સ્થાન લીધું. આ ભિન્ન ભાષાકીય ઓળખો વચ્ચે રાજકીય અસંતોષ ઊભો થયો.
મહાગુજરાત આંદોલન – જેનું નેતૃત્વ ઇન્દુલાલ યાજ્ઞિકે કર્યું હતું – એ આ ભાષાકીય ભિન્નતાને આધારે અલગ રાજ્યની માંગણી માટે મજબૂત પાયા પુરો પાડ્યો. આંદોલનના પરિણામે 1 મે 1960ના રોજ બૃહદ મુંબઇ રાજ્યમાંથી અલગ થઈને બે નવા રાજ્ય – ગુજરાત અને મહારાષ્ટ્ર –નું સર્જન થયું.
ગુજરાતની સ્થાપના એક ઐતિહાસિક ક્ષણ હતી. આ દિવસને સ્મરણરૂપ બનાવવા માટે દર વર્ષે વિવિધ સાંસ્કૃતિક કાર્યક્રમો, શૈક્ષણિક પ્રવૃત્તિઓ અને સરકારી સમારંભો યોજાય છે. 1960ના દિવસથી લઈને આજ સુધી ગુજરાતે શૈક્ષણિક, ઔદ્યોગિક અને સાંસ્કૃતિક ક્ષેત્રે નોંધપાત્ર પ્રગતિ કરી છે.
ગુજરાતની સ્થાપના મહાન સમાજસેવક રવિશંકર મહારાજના હસ્તે કરવામાં આવી હતી, જે રાજ્યના નાગરિકો માટે ગૌરવની વાત છે. આજના દિવસે આપણે માત્ર ભૂતકાળની ઝાંખી નહિં કરીએ, પણ રાજ્યના વિકાસના નવા સંકલ્પ પણ કરીએ.
ગુજરાત દિવસ માત્ર એક ઉજવણી નથી – તે ગુજરાતના લોકોની એકતા, સંસ્કૃતિ અને આત્મસન્માનનો ઉત્સવ છે.
