Gujarat Monsoon 2025 Prediction : ગુજરાતમાં આ વર્ષે ચોમાસું વહેલું દસ્તક આપી શકે, જૂનના પ્રથમ અઠવાડિયામાં મેઘરાજા પધારશે!
Gujarat Monsoon 2025 Prediction : ગુજરાતના ખેડૂતબંધુઓ માટે આશાજનક સમાચાર આવ્યા છે — ભારતીય હવામાન વિભાગે સંકેત આપ્યો છે કે રાજ્યમાં આ વર્ષે ચોમાસું સામાન્ય સમય કરતાં વહેલું આવી શકે છે. આવનારા 10 જૂન આસપાસ ગુજરાતમાં ચોમાસાના પ્રથમ વરસાદની શક્યતા દર્શાવવામાં આવી છે.
સામાન્ય રીતે ગુજરાતમાં ચોમાસાનું આગમન 15 જૂન બાદ જ થાય છે, પરંતુ આ વર્ષે વાતાવરણમાં નોંધપાત્ર ફેરફારના કારણે ચોમાસું સમય પહેલા આવી શકે છે. મેઘરાજા રાજ્યમાં ધોધમાર વરસાદ વરસાવશે તેવી આગાહી પણ કરવામાં આવી છે. રસપ્રદ વાત એ છે કે ચોમાસું શરૂ થાય તે પહેલા જ રાજ્યમાં સરેરાશ 1.25 ઈંચ વરસાદ નોંધાયો છે.
કેરળમાં ચોમાસું વહેલું, તેનો ગુજરાત પર પણ અસર
દક્ષિણ ભારતમાં કેરળ રાજ્યમાં ચોમાસાનું આગમન સામાન્ય રીતે 1 જૂન આસપાસ થાય છે. ગયા વર્ષે 30 મેના રોજ કેરળમાં ચોમાસું પ્રવેશ્યું હતું. એ વખતે ગુજરાતના સૌરાષ્ટ્ર અને દક્ષિણ તટિય વિસ્તારોમાં 10 જૂન આસપાસ વરસાદ શરૂ થયો હતો અને આખા રાજ્યમાં ચોમાસું 27 જૂન સુધી વ્યાપી ગયું હતું.
હવામાન વિભાગ અનુસાર આ વખતે પણ ચોમાસું કેરળમાં વહેલું આવે તેવી શકયતા છે, જેના પગલે ગુજરાતમાં પણ વરસાદ પહેલા આવે તે શક્ય છે.
ચોમાસાનું આગમન કેવી રીતે નક્કી થાય?
ભારતીય ઉપખંડમાં દક્ષિણપશ્ચિમ ચોમાસાનું આગમન સત્તાવાર રીતે ત્યારે જાહેર થાય છે જ્યારે ચોમાસાની ધારા કેરળના દરિયાકાંઠે પહોંચે. ત્યાંથી શરૂ થતી વરસાદની આ લહેર જુલાઈના પ્રથમ અઠવાડિયા સુધીમાં આખા દેશમાં વ્યાપી જાય છે અને સપ્ટેમ્બરથી હળવે હળવે પીછેહઠ શરૂ કરે છે. ચોમાસું 15 ઑક્ટોબર સુધીમાં ભારતમાં પૂર્ણવિરામ પર પહોંચી જાય છે.
આ વર્ષે ચોમાસું સમૃદ્ધ રહેશે
IMD (ભારતીય હવામાન વિભાગ) મુજબ, 2025ના ચોમાસા દરમ્યાન દેશમાં સરેરાશ કરતા વધુ વરસાદની શક્યતા છે. અંદાજે 105 ટકા વરસાદ પડી શકે છે, જે સામાન્ય 87 સેમી સરેરાશ કરતાં વધુ ગણાય છે. આથી ખેડૂતો માટે ચોમાસું લાભદાયી સાબિત થવાની શક્યતા છે.
ચોમાસું દરેક રાજ્યમાં અલગ સમયે પહોંચે છે
કેરળમાં આગમન પછી, ચોમાસું તબક્કાવાર રીતે તામિલનાડુ, કર્ણાટક, તેલંગાણા, આંધ્રપ્રદેશ, આસામ, મહારાષ્ટ્ર, એમપી, ઓડિશા, યુપી જેવા રાજ્યોમાં પ્રવેશ કરે છે. ઉત્તર ભારતના પ્રદેશો જેમ કે દિલ્હી, પંજાબ, રાજસ્થાનમાં ચોમાસું સામાન્ય રીતે જૂનના અંત સુધી પહોંચે છે.
છેલ્લાં વર્ષોની તારીખો પણ સંકેત આપે છે
IMDના આંકડા પ્રમાણે, ગયા વર્ષોમાં ચોમાસું 29 મેથી 8 જૂન વચ્ચે કેરળમાં પ્રવેશ્યું હતું. જોકે, અધિકારીઓ જણાવી રહ્યા છે કે કેરળમાં ચોમાસું વહેલું કે મોડું આવે તેનો સીધો અર્થ એ નથી કે સમગ્ર દેશમાં પણ એ જ ગતિ રહેશે. વાતાવરણના વૈશ્વિક અને પ્રાદેશિક પરિબળો તેના આગળના માર્ગને અસર કરે છે.
