Gujarat Weather: ગુજરાતમાં તીવ્ર ગરમી: આગામી ત્રણ દિવસ માટે હવામાન વિભાગનું હીટ વેવ એલર્ટ
Gujarat Weather: ગુજરાતમાં ઉનાળાની શરૂઆત સાથે જ ગરમી પોતાની તીવ્રતા બતાવી રહી છે. હોળીના દિવસે રાહત પછી હવે રાજ્યના મોટાભાગના વિસ્તારોમાં તાપમાન વધવા લાગ્યું છે. ભારતીય હવામાન વિભાગ (IMD) દ્વારા આગામી ત્રણ દિવસ માટે હીટ વેવ અંગે ચેતવણી જાહેર કરવામાં આવી છે, ખાસ કરીને કચ્છ અને સાઉથ ગુજરાત માટે ખાસ ઓરેન્જ એલર્ટ જારી કરાયું છે.
હવામાન ખાતાની આગાહી
હવામાન વિભાગ મુજબ, 16 થી 19 માર્ચ દરમિયાન રાજ્યના કચ્છ, સૌરાષ્ટ્ર અને દક્ષિણ ગુજરાતના દરિયાકાંઠાના વિસ્તારોમાં ભેજવાળી ગરમી રહેશે. અમદાવાદ સહિત અન્ય શહેરોમાં તાપમાન 40°Cને પાર જશે, જે સામાન્ય જનજીવનને પ્રભાવિત કરી શકે છે. ખાસ કરીને 16 અને 17 માર્ચે કચ્છ જિલ્લામાં તીવ્ર ગરમ પવનો ફૂંકાવાની શક્યતા છે.
હીટ વેવથી વધતાં તાવના કેસ
અમદાવાદની એક ખાનગી હોસ્પિટલના અહેવાલ મુજબ, તીવ્ર તાવથી સંકળાયેલા કેસોમાં 20% જેટલો વધારો થયો છે. ડૉક્ટરોએ લોકોને ગરમીના મોજા દરમિયાન સાવચેતી રાખવા અને ઘરની બહાર ઓછા જવાની સલાહ આપી છે.
ગરમીમાં સાવચેતી રાખવા માટે જરૂરી પગલાં:
તીવ્ર તાપમાને ઘરની બહાર જવાનું ટાળો.
પૂરતું પાણી પીઓ અને શરીરને હાઇડ્રેટેડ રાખો.
હળવા અને ઢીલા કપડાં પહેરો.
સીધા તડકામાં રહેવાનું ટાળો
હીટ સ્ટ્રોક અને અન્ય ગરમી સંબંધિત બીમારીઓથી બચવા તંદુરસ્ત ખોરાક અને આરામ પર ધ્યાન આપો.
હવામાન વિભાગ દ્વારા આપવામાં આવેલી ચેતવણીને ધ્યાનમાં રાખીને, સ્થાનિક વહીવટીતંત્ર અને નાગરિકોને પૂરતી તકેદારી રાખવા વિનંતી કરવામાં આવી છે.
