Gujarat Weather ગુજરાતમાં હવામાન પલટાયુ: 9 જિલ્લાઓમાં ધૂળની આંધી અને હળવા વરસાદની શક્યતા
Gujarat Weather ગુજરાતના લોકો માટે રાહતની ખબર છે. હવામાન વિભાગે આગાહી કરી છે કે આગામી દિવસોમાં રાજ્યના અનેક વિસ્તારોમાં તાપમાનમાં ઘટાડો થશે અને ધૂળની આંધી સાથે હળવો વરસાદ પણ જોવા મળી શકે છે. છેલ્લા કેટલાક દિવસોથી રાજ્ય ગરમી અને ઉંચા તાપમાનની ઝાંખી અનુભવી રહ્યું છે, પરંતુ હવે લોકોને તેમાં થોડી રાહત મળશે.
અગામી બે દિવસ ધૂળની આંધી
ભારતીય હવામાન વિભાગ (IMD) દ્વારા મળેલી માહિતી મુજબ, 21 એપ્રિલે રાજ્યના દક્ષિણ અને મધ્ય ભાગોમાં ધૂળની આંધી આવવાની શક્યતા છે. ખાસ કરીને સૌરાષ્ટ્ર, ઉત્તર ગુજરાત અને મધ્ય ગુજરાતના જિલ્લાઓમાં ધૂળના વાદળો છવાઈ શકે છે. આણંદ, કપડવંજ, તારાપુર, પેટલાદ, રાધનપુર, પાટણ, વિરમગામ, કડી, બેચરાજી, ચોટીલા, સુરેન્દ્રનગર, હળવદ અને ધ્રાંગધ્રા જેવા વિસ્તારોમાં ધૂળની ડમરીઓ જોવા મળવાની શક્યતા છે.
તાપમાનમાં થશે ઘટાડો
છેલ્લા 24 કલાકમાં અમદાવાદમાં તાપમાન 42°C નોંધાયું હતું, પરંતુ આગામી બે દિવસમાં તાપમાનમાં 2-3 ડિગ્રીનો ઘટાડો થઈ શકે છે. હવામાનશાસ્ત્રીઓનું માનવું છે કે ચોમાસા પૂર્વે સામાન્ય રીતે હવા વધુ ગતિથી ફૂંકાય છે, જે રાજ્યના વાતાવરણમાં ઠંડક લાવી શકે છે. કચ્છ અને આજુબાજુના વિસ્તારોમાં પવનની ગતિ 45 કિમી પ્રતિ કલાક સુધી પહોંચી શકે છે.
— IMD Ahmedbad (@IMDAHMEDABAD) April 20, 2025
26 એપ્રિલ પછી વરસાદની સંભાવના
હવામાન વિભાગે જણાવ્યું છે કે 26 એપ્રિલ પછી રાજ્યના 9 જિલ્લામાં હળવો વરસાદ પડી શકે છે. એપ્રિલ મહિનામાં સામાન્ય રીતે ઉંચું તાપમાન રહે છે, પરંતુ આ વર્ષે તાપમાનમાં અસામાન્ય ઘટાડો જોવા મળશે. મેઘછાયા વાતાવરણ અને ધૂળની આંધીના કારણે આ અસર થશે.
હવાનું ગુણવત્તા સ્તર (AQI)
સૌરાષ્ટ્રના કેટલાય શહેરોમાં એર ક્વોલિટી ઇન્ડેક્સ (AQI) 270 પાર થવાની શક્યતા છે, જે સ્વાસ્થ્ય માટે હાનિકારક બની શકે છે. ખાસ કરીને શ્વાસની સમસ્યા ધરાવતાં લોકોને વધુ સાવધાની રાખવાની સલાહ આપવામાં આવી છે.
