મહેમદાવાદ: અઘોરી આશ્રમમાં ગત મોડી રાત્રીએ કોઇ અજાણ્યા ઇસમોએ તિક્ષણ હથિયારથી હુમલો કર્યો

મહેમદાવાદ તાલુકાના કનીજ ગામની સીમની મેશ્વો નદીના કિનારે આવેલ અઘોરી આશ્રમમાં ગત મોડી રાત્રીએ કોઇ અજાણ્યા ઇસમોએ તિક્ષણ હથિયારથી હુમલો કર્યો હતો.આ બનાવમાં એક વ્યક્તિનું મૃત નિપજયું છે.આ બનાવની જાણ થતા મહેમદાવાદ પોલીસ સહિત ઉચ્ચ અધિકારીઓ બનાવ સ્થળે પહોચી આગળની કાર્યવાહી આરંભી હતી. તાલુકાના કનીજ ગામની સીમમાં આવેલ મેશ્વો નદી કિનારે એક અઘોરી આશ્રમ આવેલો છે.આ આશ્રમમાં ગત મોડી રાત્રીના 12:15વાગ્યાની અરસામાં કોઇ અજાણ્યા ઇસમોએ આશ્રમની લાઇટોની મેઇન સ્વીચો બંધ કરી દીધી હતી.આ સમયે આશ્રમના ખુલ્લા શેડના અંધારામાં સુઇ રહેલા બહાદુરસિંહ બળવંતસિંહ જાદવને તીક્ષણ હથિયારથી માથાના ભાગે ઉપરા છાપરી ઘા મારવામાં આવ્યા હતા.આ હૂમલામાં મહેન્દ્રસિંહ રોઠોડ અને સંજયભાઇ ભીમાભાઇ ભોઇ વચ્ચે પડતા રાત્રીના અંધારામાં અજાણ્યા ઇસમોએ તેમને લાકડીઓની ઝાપટો મારી શરીરે ઇજાઓ પહોચાડી અને બનાવ સ્થળેથી ફરાર થઇ ગયા હતા. આ બનાવની જાણ મહેમદાવાદ પોલીસને થતા ઘટના સ્થળે પહોચી વિવિધ પાસાની ઝીણવટભરી તપાસ આદરી હતી.જ્યારે મૃતક બહાદુરસિંહ બળવંતસિંહ જાદવને મહેમદાવાદ આરોગ્ય કેન્દ્રમાં પી.એમ.માટે મોકલી આપવામાં આવ્યા હતા. જોકે આ બનાવ સમયે આશ્રમના પૂજારી માનસિંહ ચંદ્રસિંહ રાઠોડ આશ્રમમાં હાજર ન હતા .આ બાદ ઉચ્ચ અધિકારીઓએ સ્થળ તપાસ કરી પૂછપરછ આદરી હતી.આ બનાવ અંગે મુકેશકુમાર તેજસિંહ જાદવ રહે,કનીજ વાંટો કુવાવાળુ ફળિયુ કનીજે મહેમદાવાદ પોલીસ મથકે અજાણ્યા ઇસમો વિરુધ્ધ ફરિયાદ નોંધાવી છે.જ્યારે મહેમદાવાદ પોલીસે ગુનો નોંધી આગળની કાર્યવાહી હાથ ધરી છે.