Kadi Visavadar bypoll controversy: ભાજપના ઉમેદવાર કમળના ચિહ્ન સાથે મતદાન મથકમાં પ્રવેશ્યા હોવાનો આરોપ
Kadi Visavadar bypoll controversy: ગુજરાતમાં ચાલી રહેલી વિધાનસભાની પેટાચૂંટણી દરમિયાન રાજકીય તાપમાન ઊંચું જઈ રહ્યું છે. આવી સ્થિતિમાં ગુજરાત કોંગ્રેસે ભાજપ વિરુદ્ધ આચારસંહિતાના ભંગના ગંભીર આરોપો લગાવતાં ખળભળાટ મચી ગઈ છે. કોંગ્રેસના પ્રવક્તા મનિષ દોશીએ પત્રકાર પરિષદ યોજીને ચૂંટણી પંચ સમક્ષ સત્તાવાર રીતે ફરિયાદ દાખલ કરી છે.
કડી બેઠકમાં ભોજન સમારંભનો આક્ષેપ
મનિષ દોશીએ જણાવ્યું કે, કડી વિધાનસભા બેઠક માટે ભાજપના ઉમેદવારને જીતાડવા મતદારોને લાલચ આપતા ભોજન સમારંભો યોજાયા છે. તેઓએ આક્ષેપ કર્યો કે થોળ સહિત કેટલાક ગામોમાં ભોજન પ્રસંગોનું આયોજન કરીને મતદારોને અસર કરવા પ્રયાસ કરવામાં આવ્યો છે. તેઓના મતે, આ પ્રક્રિયા સીધી રીતે આચારસંહિતાના ઉલ્લંઘન તરીકે જોવાઈ શકે છે.
વિસાવદર બેઠકનો મુદ્દો
કોંગ્રેસ પ્રવક્તાએ વધુમાં વિસાવદર વિધાનસભા બેઠકનો ઉલ્લેખ કરતા જણાવ્યું કે, ત્યાં ભાજપના ઉમેદવાર મતદાન મથકમાં કમળના ચૂંટણી ચિહ્ન સાથે પ્રવેશ્યા હતા, જે સ્પષ્ટ રીતે ચૂંટણી નિયમોનો ભંગ છે. આ ઘટના અંગે પણ કોંગ્રેસ દ્વારા કેન્દ્રીય ચૂંટણી પંચ સમક્ષ ફરિયાદ નોંધાવવામાં આવી છે.
કોંગ્રેસના નેતાઓને દૂર રાખવાની ફરિયાદ
મનિષ દોશીએ આક્ષેપ કર્યો કે ભાજપના આગેવાનોને મતવિસ્તારમાં રહેવાની મંજૂરી મળી રહી છે, જ્યારે કોંગ્રેસના આગેવાનોને બહાર કરવાની કાર્યવાહી કરવામાં આવી રહી છે. તેમની દલીલ હતી કે આ તટસ્થતાના માપદંડો સામે છે અને ચૂંટણી તંત્રની કામગીરી પર સવાલ ઉઠાવે છે.
લોકશાહીને દૂષિત કરવાનો પ્રયાસ?
પત્રકારો સામે પોતાની વાત મૂકતાં દોશીએ કહેલું કે ભાજપ દ્વારા સતત આચારસંહિતા ઉલ્લંઘન કરીને લોકશાહી પ્રક્રિયા પર ઘા કરવાનો પ્રયાસ થઈ રહ્યો છે. “અમે તમામ મુદ્દાઓને લઇને વિગતવાર રજુઆત કરી છે અને ચૂંટણી પંચે તાત્કાલિક અને નિષ્પક્ષ પગલાં લેવા જોઈએ,” તેમ તેમણે જણાવ્યું.
હવે નજર રહેશે કે આવનારા દિવસોમાં ચૂંટણી પંચ આ ગંભીર આરોપોને કેવી પ્રાથમિકતા આપે છે અને શું પગલાં લેવામાં આવે છે.
