Kharikat Canal Renovation : અમદાવાદ માટે નવી શાન: ખારીકટ કેનાલના રૂ. 1200 કરોડના નવનિર્માણથી પૂર્વ શહેરને મળશે નવી ઓળખ
Kharikat Canal Renovation : મેટ્રો સિટી અમદાવાદની વિકાસયાત્રા વધુ એક મોટું મોરચું જીતી રહી છે. હવે સાબરમતી રિવરફ્રન્ટ પછી શહેરને એક નવો માઈલસ્ટોન આપતો મહત્વકાંક્ષી પ્રોજેક્ટ – ખારીકટ કેનાલ નવનિર્માણ – શરૂ થયો છે.
શહેરના પૂર્વ ભાગમાં આવેલી અને રાયપુરથી ચંડોળા તળાવ સુધીની 22 કિલોમીટર લંબાઈ ધરાવતી ખારીકટ કેનાલ વર્ષો સુધી જળપ્રદૂષણ અને ગંદકીથી પીડાતી રહી હતી. સ્થાનિક રહીશો માટે આ એક મોટું તકલીફરૂપ સ્થળ બની ગયું હતું. હવે સરકાર દ્વારા રૂ. 1200 કરોડના ખર્ચે આ કેનાલને સંપૂર્ણ નવી બનાવવાનો મહાપ્રોજેક્ટ હાથ ધરાયો છે.
શું બદલાશે ખારીકટ કેનાલમાં?
બ્રિટિશ કાળ દરમિયાન 1881માં બનેલી આ કેનાલને તંત્ર દ્વારા આધુનિક અવતાર આપવામાં આવી રહ્યો છે. હવે અહીં 6 લેનનું રોડ નેટવર્ક વિકસાવવામાં આવી રહ્યું છે. કુલ 22 કિમી વિસ્તારને આવરી લેતા નવનિર્માણના ભાગરૂપે:
પ્રિ-કાસ્ટ પેરાપેટ બોક્સ લગાવવામાં આવશે
40 જેટલા પુલને આધુનિક રીતે અપગ્રેડ કરવામાં આવશે
40 જગ્યાએ નાગરિકો માટે ગ્રીન પેચ અને ફુરસદની જગ્યા બનાવાશે
નવો પૂર્વ અમદાવાદ – નવો દ્રષ્ટિકોણ
ખારીકટ કેનાલ મગજમાં રાખીને શહેરનું ઇન્ફ્રાસ્ટ્રક્ચર પૂર્વ તરફ વિસ્તરવાનું શરૂ થયું છે. પહેલા તબક્કામાં 12 કિમી લાંબો રોડ બનાવાયો છે, જેનું 80% કામ પૂરું થઈ ચૂક્યું છે. હવે મુખ્યમંત્રી ભૂપેન્દ્ર પટેલે બીજા તબક્કા માટે રૂ. 1,003 કરોડની મંજૂરી આપી છે.
આ બધું પૂરું થતાં 2027 સુધીમાં પૂર્વ અમદાવાદના નાગરિકોને એક સુંદર, સ્માર્ટ અને આરામદાયક માળખું મળશે – જે સાબરમતી રિવરફ્રન્ટની જેમ શહેરની ઓળખ બની રહેશે.
ખારીકટ કેનાલ હવે માત્ર નાળું નહીં, પણ શહેરના ગૌરવ અને હરિયાળીનું નવું ચિહ્ન બનશે.
