ગાંધીનગર : શનિવાર: કલોલ- મહેસાણા હાઇવે પરની ટ્રાફિક અને અકસ્માતની સમસ્યાને હલ કરવાના ઉમદા આશયથી માર્ગ અને મકાન વિભાગ દ્વારા કલોલ અને નંદાસણ નજીક રૂપિયા ૯૦ કરોડના ખર્ચે ઓવરબ્રિજનું નિર્માણ કરવામાં આવનાર છે. દશેરાના પાવન પર્વે રાજયના નાયબ મુખ્ય મંત્રી શ્રી નીતિનભાઇ પટેલના હસ્તે બન્ને ઓવરબ્રિજનું ખાતમુહૂર્ત કરવામાં આવ્યું હતું. જેમાં કલોલની સિંધબાજ હોટલ નજીકનો ઓવરબ્રિજ રૂ. ૫૦ કરોડના ખર્ચે અને નંદાસણ ચોકડી પાસેનો ઓવરબ્રિજ રૂ. ૪૦ કરોડના ખર્ચે નિર્માણ પામશે.
કલોલ ખાતે યોજાયેલ ખાતમુર્હતૂ સમારંભમાં રાજયના નાયબ મુખ્ય મંત્રી શ્રી નિતીનભાઇ પટેલે જણાવ્યું હતું કે, રાજય સરકારે હમેંશા જનસુખાકારીના કામોને પ્રાધાન્ય આપ્યું છે. કલોલ – મહેસાણા હાઇવે આજે વાહનોથી ધમધમતો માર્ગ છે. આ માર્ગ પર ભવિષ્યમાં ટ્રાફિકની જટિલ સમસ્યા ઉભી ન થાય અને માર્ગથી નજીકમાં રહેણાંક, સ્કુલ-કોલેજ તથા ધંધા-રોજગારનો વિકાસ થવાથી નાના મોટા અકસ્માતની દુર્ધટના ન બને તેવા શુભ આશયથી કલોલ અને નંદાસણ નજીક ટુંક સમયમાં ઓવરબ્રિજનું કામ પૂર્ણ કરવામાં આવશે. આ ઓવરબ્રિજનું નિર્માણ થયા બાદ કલોલ વાસીઓને હાઇવેને ક્રોસ કરવાની જરૂર નહિ રહે. થોડાક સમય અગાઉ હાઇવેથી કલોલ નગરના પ્રવેશ દ્રાર પાસે ઓવરબ્રિજનું નિર્માણ કરવામાં આવ્યું છે.
કલોલ ખાતે યોજાયેલ સમારંભમાં કલોલ નગરપાલિકા પ્રમુખ શ્રીમતી આનંદીબેન પટેલ, પૂર્વ સાંસદ શ્રી નટુજી ઠાકોર, કલોલના પૂર્વ ધારાસભ્ય શ્રી ર્ડા. અતુલભાઇ પટેલ, જિલ્લા ભાજપ પ્રમુખ શ્રી નૈલેશભાઇ શાહ, માર્ગ અને મકાનના સચિવ શ્રી એસ.બી.વસાવા, ચીફ ઇજનેર શ્રી કે.એમ.પટેલ સહિત મોટી સંખ્યામાં કલોલના નગરજનોન ઉપસ્થિત રહ્યાં હતાં.
નંદાસણ ખાતે યોજાયેલ સમારંભમાં કડી નગરપાલિકાના પ્રમુખ શ્રી કનુભાઇ પટેલ, કડી એપીએમસીના ચેરમેન શ્રી વિનોદભાઇ પટેલ, કડી તાલુકા પંચાયત પ્રમુખ શ્રીમતી સપનાબેન પટેલ, જિલ્લા પંચાયત, મહેસાણાના સદસ્ય શ્રીમતી નિરૂબા ડાભી સહિત આસપાસના ગામના સરપંચશ્રીઓ અને ગ્રામજનો ઉપસ્થિત રહ્યાં હતાં.