Operation Sindur : ઓપરેશન બાદ સુરક્ષા ચુસ્ત: નડાબેટમાં પરેડ બંધ અને ઝીરો પોઈન્ટ સીલ
Operation Sindur : ભારતીય સેનાએ આતંકવાદના અડ્ડાઓ પર કરી રહેલી કાર્યવાહી — ખાસ કરીને ‘ઓપરેશન સિંદૂર’ બાદ — સરહદ પર સાવચેતી વધારવામાં આવી છે. ખાસ કરીને બનાસકાંઠા જિલ્લાના નડાબેટ સરહદી વિસ્તારમાં સુરક્ષા વધુ કડક બનાવવામાં આવી છે.
હવે નડાબેટ વિસ્તારમાં પ્રવાસીઓને માત્ર ટૂરિઝમ પ્રદર્શન સુધી જ મર્યાદિત રાખવામાં આવ્યા છે. સરહદના મુખ્ય ઝીરો પોઈન્ટ સુધી જવાની મંજૂરી તાત્કાલિક અસરથી રદ કરવામાં આવી છે. તેમજ દરરોજ થતી બીએસએફ (BSF) ની પરેડ પણ રદ કરવામાં આવી છે.
સુરક્ષા અંગે કેન્દ્ર સરકાર સજાગ
એર સ્ટ્રાઇક પછી દેશમાં અને ખાસ કરીને સરહદી વિસ્તારોમાં સતત સતર્કતા રાખવામાં આવી રહી છે. કેન્દ્ર ગૃહમંત્રાલયે તમામ અર્ધલશ્કરી દળોના વડાઓને સ્પષ્ટ સૂચનાઓ આપી છે કે રજાએ ગયેલા તમામ જવાનોને પરત બોલાવવામાં આવે. ઉપરાંત, આવશ્યકતાની પરિસ્થિતિમાં નાગરિકોને રક્ષણ આપતા બંકરો (શેલ્ટર પોઈન્ટ) પણ તૈયાર રાખવા માટે કહેવામાં આવ્યું છે.
રાજ્યમાં બ્લેકઆઉટ અને મોકડ્રિલનું આયોજન
રાજ્યના 18 જિલ્લાઓમાં વિવિધ સમયગાળામાં બ્લેકઆઉટ અને મોકડ્રિલ યોજવામાં આવી છે. પૂર્વ, પશ્ચિમ અને મધ્ય ગુજરાતના વિસ્તારો માટે અલગ અલગ સમય ફાળવવામાં આવ્યા છે જેથી તમામ તંત્રો ખરા અર્થમાં તૈયારીની પરીક્ષા આપી શકે.
કેન્દ્ર તરફથી પાકિસ્તાનને મજબૂત સંદેશ
કેન્દ્રીય ગૃહમંત્રી અમિત શાહે કહ્યું હતું કે, “પહેલગામમાં થયેલા નિર્દોષ નાગરિકોના હત્યાને ભારત જે રીતે જવાબ આપી રહ્યું છે, એ દેશની લાક્ષણિક સંસ્કૃતિ દર્શાવે છે. આપણા સુરક્ષાબળો પર ગર્વ છે. આતંકવાદ સામે લડવામાં દેશ અને સરકાર બંને સંપૂર્ણપણે પ્રતિબદ્ધ છે.”
