Sarsav Group Scheme: ગુજરાતના 20 ગામોમાં નર્મદાનું પાણી પહોંચશે, નવી સરસવ ગ્રુપ યોજના શરૂ
Sarsav Group Scheme: ગુજરાત સરકારે ગ્રામ્ય વિસ્તારોમાં પાણી પુરવઠાને મજબૂત બનાવવાના ઉદ્દેશ્ય સાથે નવી સરસવ ગ્રુપ યોજના શરૂ કરી છે. આ યોજના અંતર્ગત ગોધરા અને ઘોઘંબાના 20 ગામોને નર્મદાના પાણીની સુવિધા મળશે. આ પ્રોજેક્ટ માટે 31.62 કરોડ રૂપિયાનું રોકાણ કરવામાં આવશે. પાણી પુરવઠા મંત્રી કુંવરજી બાવળિયાએ વિધાનસભામાં આ અંગે માહિતી આપી હતી.
પંચમહાલમાં નવું પાણી પુરવઠા પ્રોજેક્ટ
રાજ્યના પાણી પુરવઠા મંત્રી કુંવરજી બાવળિયાએ જણાવ્યું કે પંચમહાલ જિલ્લામાં નર્મદા મુખ્ય નહેર સાથે જોડાયેલી વિશાળ પાઇપલાઇન દ્વારા આ યોજના અમલમાં મૂકવામાં આવી છે. સરકારનો ઉદ્દેશ્ય દરેક ઘરમાં સ્વચ્છ અને શુદ્ધ પીવાનું પાણી પહોંચાડવાનો છે.
કયા ગામોને મળશે લાભ?
આ યોજના હેઠળ ગોધરા તાલુકાના 16 ગામો અને ઘોઘંબા તાલુકાના 4 ગામો, કુલ 20 ગામોને નર્મદા નદીનું પાણી આપવામાં આવશે. આ પ્રોજેક્ટ 82,300 લોકોને પીવાના પાણીની સુવિધા પૂરી પાડશે.
યોજનાની મુખ્ય વિગતો
11.79 MLD ક્ષમતાવાળો પાણી શુદ્ધિકરણ પ્લાન્ટ
2 ભૂગર્ભ સંગ્રહ ટાંકી
5 પમ્પિંગ મશીનો
184 કિમી લાંબી પાઇપલાઇન
RCC પાણી ટાંકીઓ, સ્ટાફ ક્વાર્ટર્સ અને કમ્પાઉન્ડ વોલનું નિર્માણ
પ્રોજેક્ટ ઝડપથી પૂર્ણ કરવાની તૈયારી
રાજ્ય સરકાર દ્વારા આ યોજનાને શીઘ્ર પૂર્ણ કરવા માટે કાર્ય પ્રગતિ પર છે. આ પ્રોજેક્ટ પૂર્ણ થતાં ગામડાઓમાં પાણીની તંગી દૂર થશે અને ગ્રામીણ વિસ્તારોના વિકાસને વધુ ગતિ મળશે.
