Gujarat ગુજરાતમાં વાવાઝોડાની ચેતવણી: 17થી વધુ જિલ્લાઓમાં ભારે વરસાદની શક્યતા, IMD ની આગાહીથી ચિંતા અને રાહત બંને
Gujarat ગુજરાતમાં અસહ્ય ગરમી વચ્ચે ફરી એકવાર હવામાન પરિવર્તન જોવા મળ્યું છે. રાજ્યના અનેક ભાગોમાં વરસાદી ઝાપટાં પડ્યા છે અને હવામાન વિભાગ (IMD) એ આગામી દિવસોમાં વધુ વરસાદ સાથે વાવાઝોડાની ચેતવણી આપી છે. 18 થી 19 મે સુધી રાજ્યના ઉત્તર, દક્ષિણ અને સૌરાષ્ટ્રના કુલ 23 જિલ્લાઓમાં વરસાદની શક્યતા વ્યક્ત કરવામાં આવી છે.
IMD ની આગાહી અનુસાર ક્યાં જિલ્લામાં થશે વરસાદ?
18 મેના રોજ ઉત્તર ગુજરાતના સાબરકાંઠા, અરવલ્લી, પંચમહાલ, દાહોદ અને મહિસાગર સહિતના જિલ્લાઓમાં ગાજવીજ સાથે વરસાદ થવાની સંભાવના છે. દક્ષિણ ગુજરાતના વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ અને દાદરા-નગર હવેલીમાં વાવાઝોડા સાથે વરસાદી માહોલ રહેનાર છે.
સૌરાષ્ટ્રના રાજકોટ, અમરેલી, ભાવનગર, ગીર સોમનાથ અને દીવમાં પણ હળવાથી મધ્યમ વરસાદ થઈ શકે છે. 19 મેના રોજ પણ ઘણા જિલ્લામાં છૂટાછવાયા વરસાદની સંભાવના યથાવત રહેશે, જેમાં સુરત, વડોદરા, ભરૂચ, દાહોદ, નવસારી અને અમરેલી જેવા જિલ્લામાં વધુ અસર થઈ શકે છે.
તાપમાનમાં મોટા ફેરફારની શક્યતા નહીં
હવામાન વિભાગ અનુસાર, તાપમાનમાં કોઈ મોટો ઘટાડો થવાની આશા નથી. રાજ્યના મોટા ભાગના શહેરોમાં ગરમી યથાવત રહેશે. સુરતમાં તાપમાન 35℃, અમદાવાદમાં 39℃, ગાંધીનગરમાં 38℃, સુરેન્દ્રનગરમાં 42℃ અને રાજકોટમાં પણ 39℃ નોંધાયું છે.
લોકો માટે રાહત પણ સાવચેતી જરૂરી
આ કમોસમી વરસાદથી એક તરફ તો લોકોને ગરમીથી થોડી રાહત મળશે, પરંતુ ગાજવીજ અને વાવાઝોડાની સંભાવનાને લઈને લોકોને સાવચેત રહેવાની પણ જરૂર છે. વીજળી પડવાની ઘટનાઓ, પવનના ઝોકા અને પાણી ભરાવાની સમસ્યાઓ સામે સ્થાનિક તંત્રએ પણ તૈયારી રાખવા જણાવ્યું છે.
