દેશમાંથી સત્તાવાર રીતે ચોમાસાની સીઝન સમાપ્ત થઈ ગઈ હોવા છતાં હવામાનનો મિજાજ સતત વણસી રહ્યો છે. સામાન્ય રીતે આ સમયે શિયાળાની ગુલાબી ઠંડીનો અનુભવ શરૂ થઈ જતો હોય છે, પરંતુ આ વર્ષે વાતાવરણમાં અચાનક મોટો પલટો જોવા મળી રહ્યો છે. ભારતીય હવામાન વિજ્ઞાન વિભાગ (IMD) એ આજે ૯ ઓક્ટોબરના રોજ દેશના ૧૫ થી વધુ રાજ્યોમાં ભારે પવન, ગાજવીજ અને કૌમોસમી વરસાદની ગંભીર ચેતવણી જારી કરી છે.
હવામાન વિભાગના જણાવ્યા મુજબ, દક્ષિણ કિનારાના રાજ્યો જેવા કે ઓડિશા અને તેની નજીક ઉત્તર-પશ્ચિમ બંગાળની ખાડી ઉપર એક મજબૂત ચક્રવાતી પરિભ્રમણ (Cyclonic Circulation) સક્રિય છે. આ સિસ્ટમના કારણે દેશના વિશાળ ભાગમાં ચોમાસા જેવો જ વરસાદી માહોલ ફરી ઊભો થયો છે.
૧૫ રાજ્યોમાં વાવાઝોડા અને ભારે વરસાદનું સંકટ
હવામાન વિભાગની આગાહી મુજબ, આજે દેશના ૧૫ જેટલા રાજ્યોમાં ભારે વરસાદની સાથે પ્રતિ કલાક ૪૦ થી ૬૦ કિલોમીટરની ઝડપે તેજ પવન ફુંકાવાની શક્યતા છે. આ અસરગ્રસ્ત રાજ્યોમાં ઉત્તર પ્રદેશ, બિહાર, રાષ્ટ્રીય રાજધાની દિલ્હી, રાજસ્થાન, મધ્યપ્રદેશ, ઉત્તરાખંડ, હિમાચલ પ્રદેશ, જમ્મુ-કાશ્મીર, પંજાબ, હરિયાણા, ઝારખંડ, પશ્ચિમ બંગાળ, કેરળ, કર્ણાટક અને ઓડિશાનો સમાવેશ થાય છે.
પહાડી વિસ્તારોમાં સતત પડી રહેલા વરસાદને કારણે ભૂસ્ખલન (Landslide) ની શક્યતા વધી ગઈ છે, જેને પગલે પ્રવાસીઓ અને સ્થાનિક લોકોને સાવચેત રહેવા જણાવાયું છે. પૂર્વોત્તર રાજ્યોમાં વીજળી પડવાની અને ભારે પવનના કારણે વીજ પુરવઠો ખોરવાઈ જવાની ભીતિ વ્યક્ત કરવામાં આવી છે. મધ્યપ્રદેશ, આંધ્રપ્રદેશ અને ઓડિશા જેવા રાજ્યોમાં પણ આ અચાનક આવેલા હવામાન પલટાથી જનજીવન પ્રભાવિત થઈ શકે છે.
ગુજરાતમાં આગામી ૭ દિવસ વરસાદી માહોલ
ગુજરાતની વાત કરીએ તો, રાજ્યમાંથી સત્તાવાર રીતે ચોમાસાની વિદાય થઈ ચૂકી છે, છતાં પણ રાજ્યમાં વરસાદી સિસ્ટમ પુનઃ સક્રિય થઈ છે. અમદાવાદ હવામાન કેન્દ્રના જણાવ્યા અનુસાર, ગુજરાત અને તેની આસપાસના વિસ્તારમાં બનેલી નીચા દબાણની અને ચક્રવાતી સિસ્ટમના કારણે આગામી ૭ દિવસ સુધી રાજ્યમાં માવઠા જેવો કે કૌમોસમી વરસાદી માહોલ જળવાઈ રહેશે.
રાજ્યના વિવિધ જિલ્લાઓમાં ગાજવીજ સાથે હળવાથી મધ્યમ વરસાદની શક્યતા રહેલી છે. આ અચાનક બદલાયેલા વાતાવરણના કારણે તાપમાનમાં પણ ઉતાર-ચડાવ જોવા મળી રહ્યો છે, જેનાથી એક તરફ દિવસ દરમિયાન બફારો અને રાત્રે ભેજવાળી ઠંડીનો અનુભવ થઈ રહ્યો છે.
ખેડૂતો માટે ચિંતાજનક સ્થિતિ: ઉભા પાકને નુકસાનની ભીતિ
આ અચાનક આવેલી વરસાદી સિસ્ટમે દેશભરના અને ખાસ કરીને ગુજરાત તથા મધ્યપ્રદેશના ખેડૂતોની ચિંતામાં મોટો વધારો કર્યો છે. હાલમાં ખેતરોમાં ડાંગર, કપાસ, મગફળી અને તલ જેવા ખરીફ પાકો તૈયાર સ્થિતિમાં છે અથવા લણણીનો તબક્કો ચાલી રહ્યો છે.
હવામાન વિભાગે ખેડૂતો માટે વિશેષ ચેતવણી જારી કરતા જણાવ્યું છે કે વાવાઝોડું, ભારે પવન અને વરસાદના કારણે ખેતરોમાં ઉભા પાકને મોટું નુકસાન થઈ શકે છે. કાપણી કરેલો પાક ખુલ્લામાં પડ્યો હોય તો તેને સુરક્ષિત સ્થળે ખસેડી લેવા અને ખેતરોમાં પાણીનો નિકાલ કરવાની સલાહ આપવામાં આવી છે.
