પ્રાઈવેસીની ચિંતા છે? માત્ર 24 કલાકમાં Truecaller પરથી તમારી ડિજિટલ ઓળખ આ રીતે કરો ગાયબ!
આજના ડિજિટલ યુગમાં, સ્માર્ટફોન વાપરતા લગભગ દરેક વ્યક્તિના ફોનમાં Truecaller એપ જોવા મળે છે. અજાણ્યા નંબરોની ઓળખ કરવામાં અને વપરાશકર્તાઓને સ્પામ કોલ્સ વિશે ચેતવણી આપવામાં આ એપ ખૂબ મદદરૂપ સાબિત થાય છે. જો કે, ક્યારેક આપણે નથી ઈચ્છતા કે અજાણ્યા લોકો Truecaller પર આપણો નંબર શોધે અને આપણી વ્યક્તિગત વિગતો કે નામ જુએ. જો તમે તમારી ડિજિટલ ગોપનીયતા (પ્રાઈવસી) વિશે ચિંતિત હોવ અને Truecaller પરથી તમારી ઓળખ દૂર કરવા માંગતા હોવ, તો આ માહિતી તમારા માટે ખૂબ ઉપયોગી થશે. તમે એપ અને તેના ડેટાબેઝમાંથી તમારો નંબર સરળતાથી કાયમી ધોરણે દૂર કરી શકો છો.
શું માત્ર એપ ડિલીટ કરવાથી નંબર હટી જશે?
ઘણા લોકોને એવી ગેરસમજ હોય છે કે ફોનમાંથી ટ્રૂકોલર એપ અનઇન્સ્ટોલ કે ડિલીટ કરી દેવાથી તેમનો નંબર ડેટાબેઝમાંથી પણ નીકળી જાય છે. પરંતુ વાસ્તવિકતા એ છે કે આમ કરવાથી માત્ર તમારા ફોનમાંથી એપ હટે છે, જ્યારે કંપનીના ગ્લોબલ ડેટાબેઝમાં તમારો નંબર અને નામ સુરક્ષિત જ રહે છે. તમારી ડિજિટલ ઓળખને સંપૂર્ણપણે છુપાવવા કે હટાવવા માટે તમારે બે તબક્કાની પ્રક્રિયામાંથી પસાર થવું પડશે—પહેલું, એપમાંથી તમારું એકાઉન્ટ ડીએક્ટિવેટ કરવું અને બીજું, કંપનીની વેબસાઇટ પરથી તમારા નંબરને ‘અનલિસ્ટ’ (Unlist) કરવો.
સ્ટેપ 1: ટ્રૂકોલર પરથી તમારું એકાઉન્ટ આ રીતે કરો ડીએક્ટિવેટ
સૌપ્રથમ તમારે તમારા ફોનમાં રહેલા ટ્રૂકોલર એપથી તમારું એકાઉન્ટ બંધ કરવું પડશે. આ પ્રક્રિયા એન્ડ્રોઇડ અને આઇફોન બંને માટે ખૂબ જ સરળ છે:
એન્ડ્રોઇડ યુઝર્સ માટે: સૌથી પહેલા તમારા ફોનમાં ટ્રૂકોલર એપ ખોલો. ત્યારબાદ ઉપર આપેલા ત્રણ ડોટ્સ (મેનૂ) પર ટેપ કરો. હવે Settings માં જાઓ અને ત્યાંથી Privacy Centre નો વિકલ્પ પસંદ કરો. અહીં તમને Deactivate My Account નો ઓપ્શન મળી જશે. તેના પર ક્લિક કરો. એપ તમારી પુષ્ટિ માંગશે, સૂચનાઓ વાંચીને ‘Yes’ અને પછી ‘Continue’ પર ક્લિક કરી દો. થોડીવારમાં તમારું એકાઉન્ટ ડીએક્ટિવેટ થઈ જશે.
આઇફોન (iPhone) યુઝર્સ માટે: એપ ખોલો અને તમારા પ્રોફાઇલ ફોટા પર ટેપ કરો. ત્યારબાદ, Settings માં જાઓ, Privacy Centre પર નેવિગેટ કરો અને તમારું એકાઉન્ટ બંધ કરવા માટે ‘Deactivate My Account’ વિકલ્પ પસંદ કરો. એકવાર તમારું એકાઉન્ટ બંધ થઈ જાય પછી, તમે કોલર આઈડેન્ટિફિકેશન (caller identification) અથવા સ્પામ પ્રોટેક્શન (spam protection) જેવી સુવિધાઓનો ઉપયોગ કરી શકશો નહીં.
સ્ટેપ 2: કંપનીના ડેટાબેઝમાંથી તમારો નંબર કેવી રીતે હટાવવો (Unlisting Number)
એકાઉન્ટ ડીએક્ટિવેટ કર્યા પછી તમારે તમારા નંબરને ટ્રૂકોલરની ડિરેક્ટરીમાંથી બહાર કાઢવો પડશે. તેના માટે આ પગલાં અનુસરો:
તમારા ફોન કે લેપટોપના બ્રાઉઝરમાં ટ્રૂકોલરની સત્તાવાર અનલિસ્ટિંગ વેબસાઇટ (
[truecaller.com/unlist](https://truecaller.com/unlist)) પર જાઓ.વેબસાઇટ પર તમને Unlist Your Number નો વિકલ્પ મળશે.
ત્યાં આપેલા બોક્સમાં તમારા દેશના કોડ (+91) સાથે તમારો પૂરો ફોન નંબર દાખલ કરો.
ત્યારબાદ રીકેપ્ચા (Captcha) વેરિફાઈ કરો અને નીચે આપેલા Unlist Phone Number ના બટન પર ક્લિક કરી દો.
ટ્રૂકોલરની પ્રક્રિયા મુજબ, તમારી વિનંતી સબમિટ થયા પછી કંપનીને તમારા નંબરને ડેટાબેઝમાંથી સંપૂર્ણપણે હટાવવામાં 24 કલાક સુધીનો સમય લાગી શકે છે. ત્યારબાદ ટ્રૂકોલર પર તમારો નંબર દેખાવાનું બંધ થઈ જશે.
