“આ યોગ્ય નથી”: વેસ્ટ ઈન્ડિઝ અને સાઉથ આફ્રિકાના ખેલાડીઓ ભારતમાં ફસાયા, માઈકલ વૉને ફરી એકવાર ICC પર કર્યા આકરા પ્રહાર
આંતરરાષ્ટ્રીય ક્રિકેટ કાઉન્સિલ (ICC) એ સ્પષ્ટતા કરી હોવા છતાં કે ઈંગ્લેન્ડ, વેસ્ટ ઈન્ડિઝ અને દક્ષિણ આફ્રિકાના પ્રવાસ આયોજનમાં કોઈ ‘પક્ષપાત’ કરવામાં આવ્યો નથી, ઈંગ્લેન્ડના પૂર્વ કેપ્ટન માઈકલ વૉને ફરી એકવાર વર્લ્ડ બોડી પર નિશાન સાધ્યું છે. T20 વર્લ્ડ કપ 2026 માંથી બહાર થયા બાદ વેસ્ટ ઈન્ડિઝ અને દક્ષિણ આફ્રિકાની ટીમો હજુ પણ ભારતમાં ફસાયેલી છે, જેને લઈને વૉને સોશિયલ મીડિયા પર નારાજગી વ્યક્ત કરી છે.
શું છે સમગ્ર વિવાદ?
USA, ઈઝરાયેલ અને ઈરાન વચ્ચે ચાલી રહેલા યુદ્ધને કારણે મધ્ય પૂર્વ (Middle East) માં હવાઈ પ્રવાસ પર પ્રતિબંધો લાદવામાં આવ્યા છે. આ કારણોસર, વર્લ્ડ કપમાંથી બહાર થઈ ગયેલી ટીમોને તેમના વતન પાછા મોકલવામાં મુશ્કેલી પડી રહી છે. ઈંગ્લેન્ડની ટીમ 5 માર્ચે સેમીફાઈનલ હારી હતી અને ચાર્ટર્ડ ફ્લાઈટ દ્વારા 7 માર્ચે જ રવાના થઈ ગઈ હતી. બીજી તરફ, વેસ્ટ ઈન્ડિઝ અને દક્ષિણ આફ્રિકાની ટીમો ઘણા દિવસો વહેલી ટુર્નામેન્ટમાંથી બહાર થઈ ગઈ હોવા છતાં હજુ પણ ભારતમાં જ છે.
માઈકલ વૉનનો સોશિયલ મીડિયા પર હુમલો
માઈકલ વૉને સોશિયલ મીડિયા પ્લેટફોર્મ ‘X’ પર લખ્યું હતું કે, “તમને જણાવી દઉં કે વેસ્ટ ઈન્ડિઝ 1 માર્ચે વર્લ્ડ કપમાંથી બહાર થઈ ગઈ હતી અને આજે 9 માર્ચ છે. તેઓ હજુ પણ કોલકાતામાં ફસાયેલા છે. દક્ષિણ આફ્રિકાની પણ આ જ હાલત છે. આ બિલકુલ યોગ્ય નથી. ઈંગ્લેન્ડ બહાર થયાના 36 કલાકમાં જ ચાર્ટર પ્લેનથી જતું રહ્યું, જેવી વ્યવસ્થા તમામ ટીમો માટે થવી જોઈતી હતી.”
વૉન ઉપરાંત ક્વિન્ટન ડી કોક, ડેવિડ મિલર અને ડેરેન સેમી જેવા દિગ્ગજ ખેલાડીઓએ પણ સવાલ ઉઠાવ્યા છે કે ઈંગ્લેન્ડને અન્ય બે ટીમો કરતા કેમ પ્રાથમિકતા આપવામાં આવી.
ICC એ શું આપી સફાઈ?
ICC ના પ્રવક્તાએ આ આક્ષેપોને નકારી કાઢતા જણાવ્યું હતું કે કોઈપણ ટીમને ખાસ ટ્રીટમેન્ટ આપવામાં આવી નથી. BBC ના અહેવાલ મુજબ, ICC એ સ્પષ્ટ કર્યું છે કે:
એરસ્પેસની ઉપલબ્ધતા: ફ્લાઈટ્સના રૂટ અને એરસ્પેસની મંજૂરીના આધારે જ ટીમોને મોકલવામાં આવી રહી છે.
વીઝા પ્રક્રિયા: એરક્રાફ્ટ રૂટિંગ પરમિશન અને વીઝાની જરૂરિયાતોને કારણે પ્રવાસમાં વિલંબ થયો છે.
ઓપરેશનલ સુરક્ષા: ખેલાડીઓની સુરક્ષા સૌથી મહત્વની છે અને તેના આધારે જ નિર્ણયો લેવાય છે.
ICC એ કહ્યું કે, “એવું કહેવું કે ટીમોને કોઈ અન્ય કારણોસર પ્રાથમિકતા આપવામાં આવી છે, તે તદ્દન ખોટું છે.”
ટીમોની વાપસીનું આખરી શિડ્યુલ
તાજેતરના અહેવાલો મુજબ, વેસ્ટ ઈન્ડિઝ અને દક્ષિણ આફ્રિકા બંને ટીમો આજે એટલે કે મંગળવાર, 10 માર્ચ ના રોજ ભારતથી રવાના થશે. બંને ટીમો પહેલા જોહાનિસબર્ગ જશે અને ત્યાંથી વેસ્ટ ઈન્ડિઝની ટીમ એન્ટિગુઆ માટે રવાના થશે. વેસ્ટ ઈન્ડિઝ સુપર-8 માં ભારત સામે હારીને બહાર થઈ હતી, જ્યારે પ્રોટિયાઝ ટીમ સેમીફાઈનલમાં ન્યૂઝીલેન્ડ સામે હારી ગઈ હતી.
