ટ્રેક્ટરથી લઈ પોલીહાઉસ સુધી સહાય માટે ખેડૂતોને એક મહિના સુધી અરજી કરવાની તક
મુખ્યમંત્રી ભૂપેન્દ્રભાઈ પટેલના નેતૃત્વમાં ગુજરાત સરકાર ખેડૂતોની આવક બમણી કરવા અને ખેતીને આધુનિક બનાવવા માટે મક્કમ છે. આ દિશામાં એક મહત્વપૂર્ણ નિર્ણય લેતા કૃષિ મંત્રી જીતુભાઈ વાઘાણીએ જાહેરાત કરી છે કે, આગામી ૨૭ માર્ચ ૨૦૨૬ થી ૨૬ એપ્રિલ ૨૦૨૬ સુધી ‘આઈ-ખેડૂત’ પોર્ટલ ઓનલાઈન અરજીઓ માટે ખુલ્લું મૂકવામાં આવશે. આ એક મહિનાના સમયગાળા દરમિયાન રાજ્યના ખેડૂતો અને પશુપાલકો સરકારની વિવિધ કલ્યાણકારી યોજનાઓનો લાભ લેવા માટે ઘરે બેઠા અથવા ગ્રામ પંચાયત સ્તરેથી ઓનલાઈન નોંધણી કરાવી શકશે.
૧૪૮ વિવિધ ઘટકો હેઠળ સહાય મેળવવાની સુવર્ણ તક
આ વર્ષે રાજ્ય સરકારે ખેતીવાડી, બાગાયત અને પશુપાલન એમ ત્રણેય વિભાગોને સાંકળીને કુલ ૧૪૮ ઘટકો માટે સહાય જાહેર કરી છે. જેમાં ખેતીવાડી ખાતાના ૪૨, બાગાયત ખાતાના ૯૪ અને પશુપાલન ખાતાના ૧૨ ઘટકોનો સમાવેશ થાય છે. નવા વર્ષના બજેટના અમલીકરણમાં કૃષિ વિભાગે તત્પરતા દાખવી છે, જેથી ખેડૂતોને વર્ષની શરૂઆતથી જ યોજનાકીય લાભો મળવાનું શરૂ થઈ જાય. આ પ્રક્રિયામાં અરજીઓની ચકાસણી પૂર્ણ થતાની સાથે જ પાત્રતા ધરાવતા ખેડૂતોના ખાતામાં સીધી સબસીડી જમા થાય તેવી આધુનિક વ્યવસ્થા ગોઠવવામાં આવી છે.
આધુનિક ખેતીના સાધનો અને બાગાયત પાકો માટે પ્રોત્સાહન
ખેડૂતો ખેતીને વધુ નફાકારક બનાવવા માટે ટ્રેક્ટર, કમ્બાઈન હાર્વેસ્ટર, પાવર ટીલર અને સ્માર્ટફોન જેવી વસ્તુઓની ખરીદી પર સહાય મેળવી શકશે. આ ઉપરાંત, ખેત પેદાશોના રક્ષણ માટે કાંટાળા તારની વાડ, સોલાર પાવર યુનિટ અને પમ્પ સેટ્સ માટે પણ અરજી કરી શકાશે. બાગાયત ક્ષેત્રે મીની ટ્રેક્ટર, ગ્રીન હાઉસ, કોલ્ડ સ્ટોરેજ તેમજ કમલમ (ડ્રેગન ફ્રૂટ) અને ઓઇલપામ જેવા રોકડિયા પાકોના વાવેતર માટે સરકાર દ્વારા વિશેષ પ્રોત્સાહન આપવામાં આવી રહ્યું છે, જે ખેડૂતોને આર્થિક રીતે સદ્ધર બનાવવામાં મદદરૂપ થશે.
પશુપાલકો માટેની યોજનાઓ અને અરજી કરવાની સરળ પદ્ધતિ
પશુપાલન સાથે જોડાયેલા મિત્રો માટે પણ આ પોર્ટલ આશીર્વાદરૂપ સાબિત થશે. પશુપાલકો કેટલ શેડના બાંધકામ, દૂધાળા પશુઓના ડેરી ફાર્મ, મરઘાંપાલન તાલીમ અને બકરાં એકમ સ્થાપવા માટે ઓનલાઈન અરજી કરી શકશે. અરજી કરવાની પદ્ધતિ અત્યંત સરળ રાખવામાં આવી છે, જેમાં આધાર કાર્ડ દ્વારા ઓથેન્ટિકેશન કરીને નોંધણી કરી શકાય છે. કૃષિ મંત્રીએ તમામ ખેડૂતોને છેલ્લી તારીખની રાહ જોયા વિના વહેલી તકે અરજી કરવા અનુરોધ કર્યો છે જેથી વહેલા તે પહેલાના ધોરણે યોજનાનો લાભ મેળવી શકાય.
