ભયાનક ચક્રવાત ઓખીની આગાહીના પગલે ગુજરાતમાં એલર્ટ

અરબી સમુદ્રમાં લક્ષદ્વીપ ટાપુ નજીક ઓખી નામનું વાવાઝોડુ કેન્દ્રીત થયુ છે. આ વાવાઝોડુ તા.3 થી 7 ડિસેમ્બર સુધીમાં ભારતનાં દક્ષિણ-પશ્ચિમ તરફનાં કાંઠા વિસ્તારમાં અસર કરે તેવી હવામાન વિભાગે અાગાહી કરી છે. જેને પગલે તંત્ર એલર્ટ થઇ ગયું છે, જૂનાગઢ અને ગીર-સોમનાથ જિલ્લાનાં દરિયાકાંઠા વિસ્તારમાં વાવાઝોડાની અસર વર્તાઇ રહી છે.
ચક્રવાત ઓખીને કારણે દક્ષિણ ગુજરાતમાં પાંચમી ડિસેમ્બરના રોજ વ્યાપક તેમજ કેટલાંક સ્થળોએ ભારે વરસાદ થવાની આગાહી કરવામાં આવી છે. સોમવાર અને મંગળવારે ચક્રવાત નબળો પડી જવાની સંભાવના છે. આ સાથે ગુજરાતના તમામ બંદરો ઉપર બે નંબરનું ભયજનક સિગ્નલ લગાવવામાં આવ્યું છે. ગુજરાતના વેરાવળ, પીપાવાવ, જાફરાબાદ, કંડલા પોર્ટ સહિતના બંદરો ઉપર બે નંબરનું સિગ્નલ આપવામાં આવ્યું છે. સાથે સાથે માછીમારોને દરિયો ન ખેડવાની પણ તંત્ર દ્વારા સૂચના આપવામાં આવી છે.