એરપોર્ટ સુરક્ષા વધુ મજબૂત: CISF ને મળેલી નવી જવાબદારીથી મુસાફરોને મળશે વધુ સુરક્ષા
CISF દેશમાં હવાઈ મુસાફરી કરનારાઓ માટે રાહતના સમાચાર છે. તાજેતરમાં થયેલા આતંકવાદી હુમલાઓના પગલે સરકાર હવે વધુ સતર્ક બની છે. આના પરિણામરૂપ, એરપોર્ટ સુરક્ષામાં મોટા ફેરફાર કરીને CISF (કેન્દ્રીય ઔદ્યોગિક સુરક્ષા દળ)વધુ વિસ્તૃત જવાબદારીઓ સોંપવામાં આવી છે, જેના કારણે હવાઈ મુસાફરોની સલામતી વધુ સુનિશ્ચિત થશે.
BCAS ની નવી સલાહકાર: ILHBSS અને કાર્ગો પર ખાસ ધ્યાન
બ્યુરો ઓફ સિવિલ એવિએશન સિક્યુરિટી (BCAS) દ્વારા તાજેતરમાં જારી કરાયેલ સલાહકાર મુજબ, હવે CISF ના જવાનો એવિએશન કાર્ગો કામગીરી અને ઇન-લાઇન હોલ્ડ બેગેજ સ્ક્રીનીંગ સિસ્ટમ (ILHBSS) પર પણ નજર રાખશે. અત્યાર સુધી આ કામગીરી ખાનગી સુરક્ષા એજન્સીઓના આધારે થતી હતી, પરંતુ હવે CISF ની સીધી જવાબદારી રહેશે કે ચેક-ઇન સામાન તથા કાર્ગો પ્રક્રિયામાં કોઈપણ શંકાસ્પદ પ્રવૃત્તિ ન થાય.
આતંકવાદી હુમલાઓ પછી કડક પગલાં
જમ્મુ અને કાશ્મીરના પહેલગામમાં થયેલા આતંકવાદી હુમલાના પગલે આ પગલાં લેવાયા છે. ILHBSS તથા કાર્ગો વિસ્તારોમાં હવે CISF રેન્ડમ ચેકિંગ કરી શકે છે અને ત્યાંના સ્ટાફ તેમજ મુસાફરોની હિલચાલ પર નજર રાખશે. આ સુરક્ષાનું એક નવું સ્તર છે, જે ભૂતકાળની તુલનાએ વધુ અસરકારક હોવાનું નિષ્ણાતો માને છે.
એરપોર્ટ ઓપરેટરો સાથે સંકલન
અગાઉ CISF માત્ર બાહ્ય સુરક્ષા અને મુસાફરોના ચેકિંગ સુધી મર્યાદિત હતી, પરંતુ હવે એરપોર્ટ ઓપરેટરોને CISF સાથે મળીને કામ કરવાની સૂચના આપવામાં આવી છે. દરેક સ્તરે પારદર્શિતા જાળવીને કાર્ય કરવાનું સરકારનું ઉદ્દેશ છે કે હવાઈ મુસાફરી વધુ વિશ્વસનીય બને.
