નવી દિલ્હી : ફ્રેન્ચ ઓટો કંપની સિટ્રોન (Citroen) ઈન્ડિયાએ માહિતી આપી છે કે કંપનીએ ભારતીય માર્કેટમાં તેના પહેલા મોડેલ સી 5 એરક્રોસ એસયુવીની હોમ ડિલિવરી શરૂ કરી છે. આ મોડેલ માટે ઓનલાઇન બુકિંગ પણ શરૂ કરવામાં આવ્યું છે, ત્યારબાદ કંપની ચેન્નાઈ નજીક તિરુવલ્લુર ખાતેના તેના પ્રોડક્શન પ્લાન્ટમાંથી ગ્રાહકોને એસયુવી પહોંચાડવાનું કામ કરી રહી છે. દેશમાં આ પહેલીવાર થઈ રહ્યું છે જ્યારે કોઈ કંપની પોતાની કારની હોમ ડિલિવરી કરી રહી છે.
50 જગ્યાએ ડિલિવરી શરૂ થઈ
સિટ્રોયેન હાલમાં દેશના દસ પસંદગીના શહેરોમાં તેના શોરૂમ્સ ખોલ્યા છે, જેમાં બેંગલુરુ, અમદાવાદ, ચેન્નઈ, મુંબઇ, પુણે, હૈદરાબાદ, કોલકાતા, દિલ્હી, કોચી અને ગુરુગ્રામ શામેલ છે. આ શહેરોની બહારના ગ્રાહકો માટે, કંપનીએ તેના ફ્લેગશિપ મોડેલ માટે 100% સીધી ઓનલાઇન ખરીદી શરૂ કરી છે. કંપનીએ અત્યાર સુધીમાં દેશભરમાં 50 સ્થળોએ હોમ ડિલિવરી મોડેલ લોન્ચ કર્યું છે.
આ છે કિંમત
ભારતમાં સિટ્રોન સી 5 એરક્રોસની પ્રારંભિક કિંમત 29.90 લાખ રૂપિયા છે, જ્યારે મોડેલની ટોચની કિંમત 31.90 લાખ રૂપિયા (એક્સ-શોરૂમ) છે. આ એસયુવી ફીલ અને શાઇન એમ બે વેરિએન્ટમાં રજૂ કરવામાં આવી છે.
આ છે કારની સુવિધાઓ
સિટ્રોન સી 5 એરક્રોસ 8 ઇંચની ટચ સ્ક્રીન ઇન્ફોટેનમેન્ટ સિસ્ટમથી સજ્જ છે, જે એપલ કાર પ્લે અને એન્ડ્રોઇડ ઓટો સાથે આવે છે. કારમાં ડ્યુઅલ ટોન ડેશબોર્ડ ફિનિશ આપવામાં આવી છે. તે આ કારને સ્પોર્ટી લુક આપે છે. આની સાથે, પેનોરેમિક સનરૂફ, 12.3 ઇંચ ડિજિટલ ઇન્સ્ટ્રુમેન્ટ ક્લસ્ટર, ગ્રિપ કંટ્રોલ સિસ્ટમ, બ્લાઇન્ડ સ્પોટ મોનિટરિંગ, ડ્યુઅલ ટોન 18-ઇંચ ડાયમંડ કટ એલોય વ્હીલ્સ, ડ્રાઇવર સીટ મસાજર જેવા નવીનતમ સુવિધાઓ આપવામાં આવી છે.
એન્જિન અદ્ભુત છે
સિટ્રોન સી 5 એરક્રોસ 2.0 લિટર, 4 સિલિન્ડર ડીઝલ એન્જિનથી ચાલે છે જે 177 બીએચપીનો પાવર અને 400 એનએમ પીક ટોર્ક જનરેટ કરે છે. એવો દાવો કરવામાં આવ્યો છે કે આ કાર એક લિટર ઇંધણમાં 18.6 કિમી સુધીની રેન્જ આપશે. કારમાં 8 સ્પીડ ઓટોમેટિક ટ્રાન્સમિશન ગિયરબોક્સ છે.