Supreme Court કોર્ટ રાષ્ટ્રપતિને આદેશ આપી શકતી નથી: ઉપરાષ્ટ્રપતિ ધનખડનો સુપ્રીમ કોર્ટના નિર્ણય પર પ્રતિસાદ
Supreme Court ઉપરાષ્ટ્રપતિ જગદીપ ધનખડે સુપ્રીમ કોર્ટના તાજેતરના એક નિર્ણય પર ગંભીર આક્ષેપ કર્યા છે, જેમાં કોર્ટે રાષ્ટ્રપતિ અને રાજ્યપાલો માટે વિધાનમંડળ પાસ કરેલા બિલોને મંજૂરી આપવા માટે ત્રણ મહિના સુધીની મર્યાદા નક્કી કરી છે. ધનખડે ગુરુવારે કહ્યું હતું કે અદાલત રાષ્ટ્રપતિને આદેશ આપી શકે તેમ નથી, કારણ કે તેઓ બંધારણીય રીતે દેશના સર્વોચ્ચ પદ પર છે અને તેમની જવાબદારી બંધારણના રક્ષણ અને જાળવણીની છે.
ધનખડે કહ્યું, “તાજેતરના નિર્ણયમાં રાષ્ટ્રપતિને એક નિર્દેશ આપવામાં આવ્યો છે. આપણે ક્યાં જઈ રહ્યા છીએ? દેશમાં શું ચાલી રહ્યું છે? આપણે ખૂબ સંવેદનશીલ રહેવું પડશે. આ લોકશાહીની રૂપરેખા સાથે અણગમતું છે.”
તેમણે કલમ 142 પર પણ પ્રશ્ન ઊભો કર્યો. તેમણે કહ્યું કે આ કલમ, જે સુપ્રીમ કોર્ટને વિશેષ સત્તા આપે છે, હવે “લોકશાહી વ્યવસ્થાઓ સામે પરમાણુ મિસાઇલ” બની ગઈ છે. તેમણે દલીલ કરી કે ન્યાયપાલિકાની સીમાઓ હોવી જોઈએ અને સંસદીય લોકશાહીનું સંતુલન જાળવવું ખૂબ જરૂરી છે.
ઉપરાષ્ટ્રપતિએ તમિલનાડુના કેસનો ઉલ્લેખ કરતા જણાવ્યું કે રાષ્ટ્રપતિના નિર્ણયોની ન્યાયિક સમીક્ષા કરવા જેવી દિશામાં આગળ વધવું ભવિષ્ય માટે ગંભીર ચિંતા ઊભી કરે છે.
તેમણે નવી દિલ્હીમાં જસ્ટિસ યશવંત વર્માના નિવાસસ્થાને મળી આવેલી મોટી રકમની રોકડની ઘટના પર પણ નિવેદન આપ્યું. તેમણે પૂછ્યું કે આવી ગંભીર ઘટના પછી પણ આટલા દિવસ સુધી કોઈ કાર્યવાહી કેમ ન થઈ? FIR શા માટે નોંધાઈ નથી?
ધનખડએ કહ્યું, “જ્યારે કોઈ ન્યાયાધીશ સામે ગંભીર આરોપ હોય, ત્યારે કાયદાનું શાસન દરેક માટે લાગુ પડવું જોઈએ. એ માટે કોઈ પરવાનગીની જરૂર નથી.”
આ વિવાદિત ટિપ્પણીઓએ ન્યાયપાલિકા અને વિધાયિકા વચ્ચેના સંબંધોની નવી ચર્ચા શરૂ કરી છે, ખાસ કરીને બંધારણમાં વ્યક્તિગત સત્તાના મર્યાદાને લઈને.
