બીટકોઈન: દિવ્યેશ દરજીના સુરત કનેકશનનો ભાંડો ફૂટ્યો,સુરતના અનેક લોકો અને બિલ્ડરો સાણસામાં આવી શકે..

સુરત : બીટકોઈન કેસના મુખ્ય સૂત્રધાર દિવ્યેશ દરજી દ્વારા આચરવામાં આવેલા કૌભાંડ અંગે એક્સક્લૂઝીવ રિપોર્ટ પ્રમાણે અનેક લોકોના નામ બહાર આવવાની સંભાવના જોવામાં આવી રહી છે. દિવ્યેશ દરજી સાથે સીધી રીતે આર્થિક કનેકશન ધરાવતા સુરતના અનેક લોકો અને બિલ્ડરો સાણસામાં આવી શકે એવી સંભાવના નકારી શકાતી નથી.
બીટકોઈન કેસના મુખ્ય સૂત્રધાર દિવ્યેશ દરજી સાથે સુરતના મહાખેપાની બિલ્ડરોએ કરોડો રૂપિયાનું કાળું નાણું દુબઈમાં સગેવગે કરી નાંખ્યું છે. દિવ્યેશ દરજી સાથે સાંઠગાંઠ ધરાવતા લોકોએ જે પ્રકારે દેશને આર્થિક ફટકો માર્યો છે તે જોતાં તપાસ કરી રહેલી પોલીસની પણ આંખો પહોળી થઈ જાય તેવું આ મહાકૌભાંડ આચરવામાં આવ્યું છે. સુરતના અડાજણ વિસ્તાર અને વરાછા ઉપરાંત વેસુના બિલ્ડરોએ દુબઈમાં કરોડો રૂપિયાની હેરાફેરી કરી છે. દિવ્યેશ દરજીની ધરપકડ બાદ સુરતની બિલ્ડર લોબીના પગ તળે રેલો આવી ગયો છે.મોટાપાયા પર સેટીંગ કરવા માટે ભાગમભાગ થઈ રહી છે. પોલીસ ઉપરાંત ઈડીની તપાસનો દાયરો હવે સુરતની બિલ્ડર લોબી તરફ કસાય તેવી માહિતી મળી રહી છે.
શૈલેશ ભટ્ટે બીટકોઈન કેસમાં કરોડો રૂપિયાની ખંડણીનો કેસ દાખલ કર્યો અને બાદમાં તે પોતે પણ બીટકોઈનની તપાસમાં બરાબરનો સાણસામાં આવ્યો અને નવા ખુલાસા થવા માંડ્યા. મુખ્ય સૂત્રધાર તરીકે દિવ્યેશ દરજીનું નામ બહાર આવ્યું અને પોલીસે દિવ્યેશ દરજીને મુંબઈ એરપોર્ટ પરથી ઝડપી પાડ્યો હતો. દિવ્યેશ દરજીના અંદાજે 450 કરોડ રૂપિયાના કાળા નાણા દુબઈની બેન્કોના અકાઉન્ટમાં પડ્યા છે. એવું કહેવાય છે કે બીટકોઈનના ગોરખધંધામાં દિવ્યેશ દરજીએ અનેક લોકોને નવડાવી નાંખ્યા છે. પોલીસ તપાસને દબાવી દેવાની પણ કોશીશ કરવામાં આવી હતી પરંતુ પોલીસ અધિકરીઓએ પણ જરા પણ કાઠું આપ્યું નહી અને કૌભાંડીઓને જેલના સળીયા પાછળ ધકેલી દીધા છે.
દિવ્યેશ દરજી સાથે સાંઠગાંઠ કરનારી બિલ્ડર લોબીને હેમખેમ બહાર કાઠવાની કવાયત કરવામાં આવી રહી છે. માહિતી મુજબ દિવ્યેશ દરજીની ધરપકડ બાદ સુરતની બિલ્ડર લોબીમાં મોટાપાયા પર ફફડાટ ફેલાયો છે. બીટકોઈન કેસમાં પોલીસ ખરેખર તપાસ કરવા માંગતી હોય તો જેલના સળીયા પાછળ ધકેલાયેલા દિવ્યેશ દરજીની આકરી પુછપરછ કરવામાં આવે તો ઈન્ટરનેશનલ લેવલનું મહાકૌભાંડનો પર્દાફાશ થઈ શકે એમ છે.
હવે પછીના રિપોર્ટમાં આપણે વાંચીશું કે દિવ્યેશ દરજી સાથે સુરતના ક્યા ક્યા લોકો સંડોવાયેલા અને તેમનું કેટલું કાળું નાણું ક્યાં અને કેવી રીતે પગ કરી દેવામાં આવ્યું છે. દિવ્યેશ દરજી સાથે ધરોબો ધરાવતા લોકોના નામ હવે પછી પ્રસિદ્વ કરવામાં આવશે.જેની વાચકોએ નોંધ લેવી.