ઝારખંડ વિધાનસભાની ચૂંટણીનાં છેલ્લા તબક્કાની 16 બેઠકોમાંથી નક્સલ પ્રભાવિત પાંચ બેઠકો માટે સવારે 7 વાગ્યાથી બપોરનાં 3 વાગ્યા સુધી મતદાન યોજાશે, જ્યારે બાકીની 11 બેઠકો પર મતદારો સાંજનાં 5 વાગ્યા સુધી તેમના મતાધિકારનો ઉપયોગ કરી શકશે.
ઝારખંડનાં અધિક મુખ્ય ચૂંટણી અધિકારી શૈલેષકુમાર ચૌરસિયાનાં જણાવ્યા અનુસાર રાજમહલ, પાકુડ, નાલા, જામતાડા, દુમકા, જામા, જરમુન્ડી, સારથ, પોડૈયાહાટ, ગોડ્ડા અને મહાગામમાં મતદાતાઓ સવારે 7 થી સાંજનાં 5 વાગ્યા સુધી તેમના મતાધિકારનો ઉપયોગ કરી શકશે. જ્યારે બોરીયો, બરહેટ, લિટ્ટીપાડા, મહેશપુર અને શિકારીપાડામાં સવારે 7 થી બપોરે 3 વાગ્યા સુધી મતદાન યોજાશે.
ઝારખંડ વિધાનસભાની ચૂંટણીમાં આજે પાંચમાં તબક્કા હેઠળ 16 બેઠકો પર મતદાન યોજાશે. પાંચમા તબક્કામાં 6 જિલ્લાની 16 બેઠકોનાં કુલ 237 ઉમેદવારોનું ભાવિ મતપેટીઓમાં બંધ થશે. મતદાન માટે સુરક્ષાને લઇને ચુસ્ત બંદોબસ્ત ગોઠવી દેવામાં આવ્યો છે. ઝારખંડમાં મતદાનનાં કુલ પાંચ તબક્કાઓ છે. પાંચમા તબક્કામાં ઝારખંડનાં રાજમહલ, બોરીયો, લિટ્ટીપાડા, સારઠ, પાકુડ, શિકારીપાડા, નાલા, જામા, ગોડ્ડા, જામતાડા, બરહેટ, દુમકા, જરમુંડી, મહગામા, મહેશપુર અને પોડૈયાહાટમાં મતદાન થશે. 23 ડિસેમ્બરે ચૂંટણીનાં પરિણામો જાહેર કરવામાં આવશે.