દસ્તાવેજ કરવામાં સ્ટેમ્પ પેપર મેળવવામાં પડતી મુશ્કેલી ટાળવા માટે તેમજ તથા સ્ટેમ્પ વેન્ડર મારફતે વેચાતા પરંપરાગત સ્ટેમ્પ પેપરની કૃત્રિમ અછત ઊભી કરી સ્ટેમ્પ વેન્ડરો દ્વારા વધુ કિંમત વસૂલ કરી નાગરિકોને છેતરવાનો પ્રયાસ થતો હોવાની ફરિયાદોના પગલે હવે તા.1લી ઓક્ટોબરથી રાજ્ય સરકાર દ્વારા રજૂઆતોને રાજ્ય સરકાર દ્વારા નોન જ્યુડિશિયલ ફિઝિકલ સ્ટેમ્પ પેપરના ઉપયોગને બંધ કરી ફક્ત ડિજિટલ સ્ટેમ્પિંગની પદ્ધતિનો ઉપયોગ કરવાનો નિર્ણય લેવામાં આવ્યો છે.
આજે ગાંધીનગરમાં મહેસૂલ મંત્રી કૌશિક પટેલે જણાવ્યું હતું કે, પ્રજાજનોને 1લી ઓક્ટોબર 2019થી ફિઝિકલ સ્ટેમ્પ સેવા બંધ થતા સ્ટેમ્પ મેળવવામાં કે સ્ટેમ્પ ડ્યુટીની ચૂકવણીમાં કોઇ તકલીફ ના પડે તે માટે ઇ-સ્ટેમ્પિંગની સુવિધાથી હવેથી શિડ્યુલ બેંકો, કેન્દ્ર અને રાજ્ય સરકારના નિયંત્રણ હેઠળની નાણાકીય સંસ્થાઓ કે એકમો, પોસ્ટ ઓફિસ ઉપરાંત લાઇસન્સી સ્ટેમ્પ વેન્ડર, ચાર્ટર્ડ એકાઉટન્ટ, કંપની સેક્રેટરી, બંદર/પોર્ટ ખાતેના સી & એફ એજન્ટ, ઇ-ગવર્નસ પ્લાન હેઠળ કાર્યરત કોમન સર્વિસ સેન્ટર, RBI રજિસ્ટર્ડ નોન બેંકિંગ ફાઇનાન્સીયલ કંપની અને લાઇસન્સી નોટરી પૈકી જે વ્યક્તિઓ/ સંસ્થાઓ જે તે જિલ્લાની સ્ટોક હોલ્ડિંગ કોર્પોરેશનની કચેરી ખાતે રજિસ્ટ્રેશન માટે અરજી કરી શકશે. સુપરિ. ઓફ સ્ટેમ્પ્સ દ્વારા આ વ્યક્તિઓ/સંસ્થાઓને ઈ-સ્ટેમ્પિંગના ACC (ઓથોરાઈઝ્ડ કલેક્શન સેન્ટર) તરીકેની નિમણૂકની પરવાનગી આપ્યા બાદ આ સેન્ટરો ડિજિટલ ઈ-સ્ટેમ્પિંગની સુવિધાઓ ઉપલબ્ધ કરાવી શકશે.
ડિજિટલ સ્ટેમ્પિંગના ફાયદા અંગે પટેલે કહ્યું હતું કે, નાગરિકોને જ્યારે સ્ટેમ્પ ડ્યૂટીની ચૂકવણી કરવાની હોય ત્યારે ડિજિટલ સ્ટેમ્પિંગના ઓથોરાઈઝડ કેન્દ્રો ઉપરથી જરૂરી રકમની સ્ટેમ્પ ડ્યૂટીની ચુકવણી કરીને જરૂરી રકમનું ડિજિટલ સ્ટેમ્પ સર્ટિફિકેટ મેળવી શકશે. જેમાં પક્ષકારોના નામ ઉપરાંત દસ્તાવેજની વિગત તથા દસ્તાવેજની રકમ જેવી વિગતો પણ દર્શાવવામાં આવશે. ડિજિટલ સ્ટેમ્પ સર્ટિફિકેટ ધારણ કરનાર વ્યક્તિ દ્વારા સર્ટિફિકેટની ઓન લાઈન તેમજ મોબાઈલ એપ્લિકેશન દ્વારા પણ ખરાઈ કરી શકાશે. જેથી, સ્ટેમ્પ સર્ટિફિકેટની છેતરપિંડી કે ડુપ્લિકેશનનો કોઈ અવકાશ રહેશે નહીં.
ડિજિટલ સ્ટેમ્પિંગ પદ્ધતિ અમલમાં આવવાથી આ પધ્ધતિ હેઠળ સ્ટેમ્પ ડ્યૂટીની ચૂકવણી કરતાં એક યુનિક સર્ટિફિકેટ નંબર જનરેટ થશે. જેની ખરાઈ દસ્તાવેજ નોંધણી સમયે સબ રજિસ્ટ્રાર કચેરી દ્વારા કરવામાં આવશે. જેથી દસ્તાવેજની નોંધણી પણ સુરક્ષિત બનશે. આ ઉપરાંત આ રેકર્ડની ઉપલબ્ધિ ઓન લાઈન હોવાથી તે કોઈ પણ સમયે ચકાસી શકાશે, તેનો પુરાવો પણ મેળવી શકાશે. વધુમાં, ડિજિટલ સ્ટેમ્પિંગ પદ્ધતિમાં ફિઝિકલ સ્ટેમ્પિંગ પદ્ધતિની જેમ એડ્વાન્સમાં કોરા સ્ટેમ્પ પેપર ખરીદવાની જરૂરિયાતમાંથી મુક્તિ મળતાં પ્રજાજનોને રિફંડના પ્રશ્નો પણ ઉદભવશે નહીં. ઉપરાંત, જરૂરિયાત મુજબ કોઈપણ રકમની સ્ટેમ્પ ડ્યૂટી ચૂકવવાની સુવિધા મળશે. સરકારની ઈ-પેમેન્ટ સ્ટેમ્પ ડ્યૂટીની ચૂકવણી માટે વિવિધ વિકલ્પો ઉપલબ્ધ થશે જેની વિગતો આપતાં મહેસૂલ મંત્રીએ કહ્યું હતું કે, નાગરિકોને સ્ટેમ્પ ડ્યૂટીની ચૂકવણી કરવા રોકડ ઉપરાંત, RTGS, નેટ બેંકિંગ, ઓન લાઈન પેમેન્ટ જેવા વિવિધ વિકલ્પો ઉપલબ્ધ થશે. આ સેવાનો વ્યાપ વધતાં તથા ઓનલાઈન સેવાઓ હોવાથી નાગરિકોને જ્યારે પણ સ્ટેમ્પ ડ્યૂટી ભરવી હશે ત્યારે સરળતાથી નજીકના ડિજિટલ સ્ટેમ્પિંગના ઓથોરાઈઝડ વેન્ડર પાસેથી અથવા તો બેંકો પાસેથી સેવા ઉપલબ્ધ થશે. રાજ્યમાં બહોળા પ્રમાણમાં ઇ-સ્ટેમ્પિંગ સુવિધા કેન્દ્રો શરૂ થવાથી નાગરિકો તેમની નજીકના સ્થળે, કોઇપણ સમયે સ્ટેમ્પ ડ્યુટી ભરી તેનું સ્ટેમ્પ પેપર જેવું પ્રમાણપત્ર મેળવી પોતાના લેખ સાથે જોડીને લેખની નોંઘણી કરાવી શકશે તેમ તેમણે ઉમેર્યું હતું.
