Jharkhand News – અનેક સમન્સને અવગણનાર ઝારખંડના પૂર્વ મુખ્યમંત્રી હેમંત સોરેનની બુધવારે ધરપકડ કરવામાં આવી હતી. EDએ તેમની જમીન કૌભાંડમાં ધરપકડ કરી છે. તેને આજે એટલે કે ગુરુવારે સ્થાનિક કોર્ટમાં રજૂ કરવામાં આવશે, જ્યાં ED 14 દિવસના રિમાન્ડની માંગ કરશે. ધરપકડ થતાં પહેલાં સોરેન રાજભવન ગયા હતા અને મુખ્યમંત્રી પદેથી રાજીનામું આપ્યું હતું, જેને રાજ્યપાલે સ્વીકાર્યું હતું.
સોરેન ઝારખંડના કાર્યવાહક મુખ્યમંત્રી તરીકે યથાવત છે
જો કે, રાજીનામું આપ્યા પછી પણ હેમંત સોરેન ઝારખંડના કાર્યવાહક મુખ્યમંત્રી તરીકે યથાવત છે. કાયદા મુજબ કોઈ પણ રાજ્યના મુખ્યમંત્રીનું પદ ખાલી ન રહી શકે. રાજીનામા બાદ રાજ્યપાલ સીએમને કાર્યકારી સીએમ તરીકે રાખે છે. જ્યારે આગામી મુખ્યમંત્રી શપથ લેશે ત્યારે અગાઉના મુખ્યમંત્રી કાર્યકારી મુખ્યમંત્રી રહેશે.
ચંપાઈ સોરેન ધારાસભ્ય દળના નેતા તરીકે ચૂંટાયા હતા
આ સમગ્ર ઘટના ઝારખંડમાં બની છે. હેમત સોરેને રાજીનામું આપી દીધું છે. ચંપાઈ સોરેનને ધારાસભ્ય દળના નેતા તરીકે પસંદ કરવામાં આવ્યા છે. ચંપાઈ સોરેન હવે ઝારખંડના નવા મુખ્યમંત્રી બનશે. પરંતુ રાજ્યપાલે હજુ સુધી તેમને શપથ લેવડાવ્યા નથી. જેએમએમના ધારાસભ્યોએ તેમને તાત્કાલિક શપથ ગ્રહણ કરાવવા માટે બુધવારે રાત્રે રાજભવનમાં હંગામો મચાવ્યો હતો. પરંતુ રાજ્યપાલે કોઈ નિર્ણય લીધો ન હતો.
આ કેસમાં અત્યાર સુધીમાં 14 લોકોની ધરપકડ કરવામાં આવી છે
ઝારખંડ મુક્તિ મોરચાના નેતા હેમંત સોરેન પર મની લોન્ડરિંગ અને જમીન માફિયા સાથેના કથિત સંબંધો ઉપરાંત કેટલીક સ્થાવર મિલકતોના કથિત ગેરકાયદે કબજાના આરોપોનો સામનો કરવો પડે છે. કેન્દ્રીય એજન્સી ED અનુસાર, આ તપાસ ઝારખંડમાં માફિયાઓ દ્વારા જમીનની માલિકીના ગેરકાયદેસર ફેરફારના મોટા રેકેટ સાથે જોડાયેલી છે. EDએ આ કેસમાં અત્યાર સુધીમાં 14 લોકોની ધરપકડ કરી છે, જેમાં 2011 બેચના IAS અધિકારી છવી રંજનનો સમાવેશ થાય છે, જેમણે રાજ્યના સમાજ કલ્યાણ વિભાગના ડિરેક્ટર અને રાંચીના ડેપ્યુટી કમિશનર તરીકે સેવા આપી હતી.