જયપુરમાં સિલિન્ડર ફાટવાથી એક જ પરિવારના 5 સભ્યોનાં મોત નીપજ્યા

જયપુરના એક મકાનમાં વહેલી સવારે ગેસ સિલિન્ડર ફાટવાના કારણે ઘરમાં આગ લાગી હતી. આગમાં ઘરના પાંચ લોકોના મૃત્યુ થયા છે. આ ઘટના વિદ્યાનગરના સેક્ટર-9માં બની છે. પ્રથમ દ્રષ્ટિએ સિલિન્ડર ફાટવાથી આગ લાગવાનું નોંધવામાં આવ્યુ છે. ઉંઘમાં હોવાના કારણે ઘરના લોકોને બચવાની તક મળી નહીં. જ્યાં સુધી લોકો ઉંઘમાંથી જાગે ત્યાં સુધી તો આગે ભીષણ સ્વરૂપ લઈ લીધુ હતુ. ઘરના રૂમ પણ સંપૂર્ણ રીતે બળીને ખાખ થઈ ગયા છે. ધડાકાનો અવાજ સાંભળીને આસપાસના લોકો જાગી ગયા અને તેમણે ઘટનાની જાણકારી પોલીસને આપી હતી.પોલીસે ફાયરને કોલ કરી દીધો હતો એ પહેલા જ ત્યાંના સ્થાનીકોએ મદદ શરૂ કરી દીધી હતી.અામ છતાં કોઈને બચાવી શકાયા ન હતા. મૃતકોમાં મહેન્દ્ર ગર્ગ, અર્પિતા, અપૂર્વ, અનિમેષ અને સૌમ્યાનો સમાવેશ થાય છે.દુર્ઘટના સમયે મકાન માલીક સંજીવ ગર્ગ અને તેમની પત્ની બહાર હોવાથી તેમનો બચાવ થયો છે.