MobiKwik IPO: મોબીક્વિકના આઈપીઓને સેબી તરફથી મળી મંજૂરી, 1900 કરોડ એકત્ર કરવાનો પ્લાન
MobiKwik ને સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI) તરફથી રૂ. 1,900 કરોડની પ્રારંભિક જાહેર ઓફર (IPO) માટે મંજૂરી મળી છે. ગુરુગ્રામ સ્થિત કંપનીએ જુલાઈમાં SEBI સાથે IPO (DRHP) માટે દસ્તાવેજો રજૂ કર્યા હતા.
કંપની IPO માંથી રૂ. 1,900 કરોડ એકત્ર કરવા માંગે છે. IPO અંતર્ગત રૂ .1,500 કરોડના નવા શેર જારી કરવામાં આવશે. આ સિવાય, કંપનીના હાલના શેરધારકો 400 કરોડ રૂપિયાની વેચાણ માટે ઓફર લાવશે. મર્ચન્ટ બેન્કિંગ સૂત્રોએ જણાવ્યું હતું કે સેબીએ મોબીક્વિકના આઈપીઓને મંજૂરી આપી દીધી છે. આ અંગે કંપની તરફથી તાત્કાલિક કોઈ પ્રતિક્રિયા મળી નથી.
સિક્વોઇયા કેપિટલ અને બજાજ ફાઇનાન્સ લિમિટેડ મોબીક્વિકમાં મોટા રોકાણ ધરાવે છે. આ કંપનીની સીધી સ્પર્ધા વોટ્સએપ પે, ગૂગલ પે, ફોન પે, પેટીએમ જેવી પેમેન્ટ એપ સાથે છે. PwC ના રિપોર્ટ અનુસાર, ભારતનું ડિજિટલ પેમેન્ટ માર્કેટ 2022-2030 સુધીમાં 2.3 ટ્રિલિયન ડોલર સુધી પહોંચી શકે છે. આવી સ્થિતિમાં, મોબીક્વિક જેવી ડિજિટલ પેમેન્ટ સુવિધા પૂરી પાડતી કંપનીઓ માટે મોટો અવકાશ છે.
1 કરોડથી વધુ યુઝર્સ છે
મોબીક્વિક દ્વારા દરરોજ 10 લાખથી વધુ વ્યવહારો થાય છે. મોબીક્વિકનો ઉપયોગ કરીને, ફોન રિચાર્જ કરી શકાય છે, બિલ જમા કરી શકાય છે અને ચૂકવણી પણ ઘણી જગ્યાએ કરી શકાય છે. હાલમાં, 30 લાખથી વધુ વેપારીઓ અને છૂટક વેપારીઓ મોબીક્વિક સાથે સંકળાયેલા છે. હાલમાં, મોબિકવિકના ગ્રાહકોની સંખ્યા 1.07 કરોડથી વધુ છે.
Paytm સૌથી મોટો IPO લાવવાની તૈયારી કરી રહ્યો છે
આ પહેલા Paytm એ દેશનો સૌથી મોટો IPO લાવવાની પણ જાહેરાત કરી છે. Paytm ના બોર્ડે આ વર્ષે ઓક્ટોબર-ડિસેમ્બર ક્વાર્ટરમાં IPO મારફતે લગભગ 22,000 કરોડ રૂપિયા એકત્ર કરવાના પ્રસ્તાવને સૈદ્ધાંતિક મંજૂરી આપી છે. કંપનીનું લક્ષ્ય છે કે આ IPO માં તેના સમગ્ર સાહસનું બજાર મૂલ્ય 2 લાખ કરોડ રૂપિયાથી ઉપર હશે. આ હાલના રોકાણકારોને તેમના કેટલાક શેર વેચવાની તક પણ આપશે.
