હવે નવા નિયમ મુજૂૂબ 20 વર્ષથી વધુ જૂના વાહન ભંગારમાં કાઢવા પડશે

જો તમે 20 વર્ષથી જૂનુ કોમર્શિયલ વાહન વાપરી રહ્યા હોવ તો તમારા માટે મહત્વના સમાચાર છે. પ્રદૂષણ ફેલાવતા લાખો વાહનો સામે સરકારે લાલ આંખ કરી છે. કોમર્શિયલ વાહનો માટે સરકાર 20 વર્ષની સમયમર્યાદા નક્કી કરી શકે છે. સરકારી અધિકારીએ જણાવ્યા મુજબ 2020 સુધીમાં વ્હિકલ સ્ક્રેપિંગ પોલિસી લાગૂ થઇ શકે છે.
અધિકારીએ જણાવ્યું કે નિયમ લાગૂ થયા બાદ 2000 પહેલા રજિસ્ટર્ડ થયેલા તમામ કોમર્શિયલ વાહનોને ભંગારમાં કાઢવા પડશે, અને સરકાર આ પોલિસીને મંજૂરી આપે તે પછી નોંધાયેલા વાહનોની લાઇફટાઇમ 20 વર્ષની રહેશે. નીતિ આયોગના CEO, સેક્રેટરીઝ ઑફ ફાઇનાન્સ, ટ્રાન્સપોર્ટ, હેવી ઇન્ડસ્ટ્રીઝ, DIPP અને MSME મિનિસ્ટ્રીની પીએમઓમાં બેઠક મળી હતી. જેમાં વિહિલક સ્ક્રેપિંગ પોલિસીને મંજૂરી આપી દેવામાં આવી છે. ટૂંક સમયમાં જ અંતિમ મંજૂરી માટે આ પોલિસીને કેબિનેટ સમક્ષ રજૂ કરવામાં આવશે. ઉલ્લેખનીય છે કે વર્ષ 2000 પહેલાં 7 લાખ કોમર્શિયલ વાહનો રજિસ્ટર થયાં હતાં.
અધિકારીએ જણાવ્યું કે, સ્ટિલ મિનિસ્ટ્રી દ્વારા સ્ક્રેપિંગ સેન્ટર સેટઅપ કરવામાં આવશે. સૂચિત પોલિસી મુજબ 2000 પહેલાં રજિસ્ટર થયેલાં વાહનોને નવા સાથે રિપ્લેસ કરવા પર અમુક પ્રોત્સાહનો આપવામાં આવશે. પોલિસી મુજબ જેમના પણ વાહનને ઑફ રોડ કરી દેવામાં આવ્યાં હશે તેમને નવા વાહન ખરીદવા પર જીએસટી દર ઓછો ભરવો પડશે, ભંગારની સારી કિંમત આપવામાં આવશે અને ઑટોમોબાઇલ મેન્યુફેક્ચરર દ્વારા નવા વાહન પર ડિસ્કાઉન્ટ આપવામાં આવશે. જેને કારણે નવું વાહન ખરીદવાના ખર્ચામાં 15 ટકાનો ઘટાડો થશે.
અધિકારીએ કહ્યું કે, “બદલેલા વાહનોમાં જીએસટી દર ઘટાડવા માટે અમે જીએસટી કાઉન્સિલ સમક્ષ આ પ્રપોઝલ રાખીશું.” અગાઉ 2016માં રોડ ટ્રાન્સપોર્ટ એન્ડ હાઇવે મિનિસ્ટ્રીએ રજૂ કરેલ વ્હિકલ સ્ક્રેપિંગ પોલિસીના ડ્રાફ્ટમાં કહ્યું હતું કે 15 વર્ષથી જૂના વાહનોને ભંગારમાં કાઢી નાખવા જોઇએ. ત્યારે કમિટિએ વાહનોની લાઇફલાઇન 20 વર્ષની રાખવાનું નક્કી કર્યું.
યોજના અંતર્ગત વાહનના રિપ્લેસમેન્ટ સમયે સૂચિત તમામ લાભો લેવા માટે રિસાઇક્લિંગ સેન્ટર ખાતે વાહન સંબંધી તમામ દસ્તાવેજો જમા કરાવવા પડશે. વેરિફિકેશન થયા બાદ વાહનના માલિકને ભંગારની કિંમત અને એક સર્ટિફિકેટ મળશે. ડિસ્કાઉન્ટ અને ટેક્સ ઘટાડા માટે નવું વાહન ખરીદતી વખતે આ સર્ટિફિકેટ ડિલરને આપવું પડશે.