Operation Sindoor: પ્રિયંકા ગાંધીની પ્રશંસા, દેશભરમાં વધેલી સુરક્ષા
Operation Sindoor ‘ઓપરેશન સિંદૂર’ અંતર્ગત ભારતીય સેનાએ પાકિસ્તાન અને પાકિસ્તાની અધિકૃત કાશ્મીર (POK)માં આવેલી આતંકવાદી ઠેકાણાઓ પર સફળ હવાઈ હુમલાઓ કર્યા હતા. આ ઐતિહાસિક કાર્યવાહી બાદ સમગ્ર દેશમાં ગર્વની લાગણી પ્રસરી ગઈ છે. કોંગ્રેસ નેતા પ્રિયંકા ગાંધીએ આ પ્રસંગે સેનાની હિંમત અને નિષ્ઠાની પ્રશંસા કરી છે.
પ્રિયંકા ગાંધીએ X (અગાઉનું ટ્વિટર) પર લખ્યું હતું કે, “અમને અમારી સેના પર અત્યંત ગર્વ છે. આપણા બહાદુર જવાનો દેશની અખંડિતતા અને સ્વતંત્રતાનું રક્ષણ કરે છે. ભગવાન તેમનું રક્ષણ કરે અને તેમને પડકારો સામે હિંમત અને ધીરજ આપે. જય હિન્દ!”
https://twitter.com/priyankagandhi/status/1919975987938275519
પ્રિયંકા ગાંધી ઉપરાંત રાહુલ ગાંધી, શશિ થરૂર, જયરામ રમેશ અને અરવિંદ કેજરીવાલ જેવા અનેક નેતાઓએ પણ સેનાની કામગીરીના સમર્થનમાં નિવેદનો આપ્યા છે. દરેક પક્ષના નેતાઓએ રાજકારણથી ઊંચે ઊઠીને રાષ્ટ્રીય એકતાનું પ્રતિબિંબ આપ્યું છે.
આ દરમ્યાન, દિલ્હી સહિત રાષ્ટ્રીય સ્તરે સુરક્ષા વ્યવસ્થા વધારવામાં આવી છે. મહત્વપૂર્ણ સરકારી ભવનો, સરહદો અને જાહેર સ્થળોએ સુરક્ષા એજન્સીઓ દ્વારા વધુ ચુસ્ત પગલાં લેવામાં આવ્યા છે. પોલીસે રાત્રે પેટ્રોલિંગ વધાર્યું છે અને સોશિયલ મીડિયા પર પણ નજર રાખવામાં આવી રહી છે, જેથી કોઇ અફવા અથવા ઉશ્કેરણી નહીં ફેલાય.
પાકિસ્તાન તરફથી આ ઓપરેશન પર નારાજગી વ્યક્ત કરવામાં આવી છે. વિદેશ મંત્રાલયે નિવેદન આપી જણાવ્યું કે ભારતે પાકિસ્તાનની સરહદે હવાઈ હુમલા કરીને આપણા સાર્વભૌમત્વનું ઉલ્લંઘન કર્યું છે. તેમનું કહેવું છે કે ભારતીય વાયુસેનાએ નાગરિક વિસ્તારોને નિશાન બનાવ્યા છે, જે માનવ અધિકાર વિરુદ્ધ છે.
તો બીજી બાજુ, ભારતે સ્પષ્ટ રીતે કહ્યું છે કે ‘ઓપરેશન સિંદૂર’ આતંકવાદ વિરોધી પગલું છે, અને આ હુમલાનું ઉદ્દેશ્ય આતંકી તત્વોનો નાશ કરવાનો છે — કોઇ દેશ પર હુમલો કરવાનો નહિ.
